«Յուղուրջյանը ոնց որ չոբան լինի, էնպես ա խոսում աշխատողների հետ». անճոռնի բարքեր՝ Արտաշատի ստոմատոլոգիական պոլիկլինիկայում

Մամուլում օրերս տեղեկություններ կային, որ Արարատի մարզի Արտաշատ քաղաքի ստոմատոլոգիական պոլիկլինիկայի գլխավոր բժիշկ Յուղուրջյանը պոլիկլինիկայի մի քանի աշխատակցի ազատել է աշխատանքից:

NEWSPRESS.am-ը տեղեկացավ, որ նա աշխատանքից ազատել է բուժքույրերի, յուրաքանչյուր երկու բժշկին թողնելով մեկ բուժքույր, իսկ ընդհանրապես, մեկ ատամնաբույժի մեկ բուժքույր է անհրաժեշտ՝ համապատասխան ծառայություններ մատուցելու թե՛ պացիենտին, թե՛ ստոմատոլոգին:

Աղբյուրը նշեց, որ յուրաքանչյուր բժիշկ ամսական 200 000 դրամ «նալոգ» է վճարում Յուղուրջյանին, իսկ բուժքրոջ համար բժիշկն իր գրպանից վճարում է 37 հազար դրամ:

«Կարող է պատահել, որ ատամը քաշելու ժամանակ պացիենտը վատանում է, իսկ բուժքույրն այդ նույն ընթացքում զբաղված է մյուս ատամնաբույժի մոտ՝ ատամի պլոմբն է պատրաստում, ո՞նց կլինի»,- ասաց նա՝ ավելացնելով, որ Յուղուրջյանը միշտ էլ աչքի է ընկել իր աշխատակիցիների նկատմամբ վատ վերաբերմունքով, միայն բժիշկներին է հարգում, որ իրեն վճարում են:

Պատմեց, որ մի անգամ մարտի ութին բոլորին հրավիրել էր բանկետի, իսկ «սանիտարկաներին»՝ ոչ. «Իսկ այդ սանիտարկների մեջ բարձրագույն կրթություն ունեցող կին կար, որ իրա հիմնարկի թքամանն էր մաքրում ստիպված, քանի որ ուրիշ աշխատանք չէր գտել, կարելի՞ է այդքան անմարդկային լինել»:

Բացի այդ, ինչպես փոխանցեց մեր աղբյուրը, նա մշտապես բուժքույրերին ասում է, որ «պատերի տակ թափած են բուժքույրերը», աշխատանք են ման գալիս, ուզում եք՝ էդ աշխատավարձն ուզեք, չէ՝ կարող եք դուրս գալ գործից: Իսկ աշխատավարձը նվազագույնն է՝ 55 000 դրամ, իսկ այսօր մարդիկ նաև այդ գումարից են զրկվել, քանի որ Յուղուրջյանը տնտեսումներ է անում՝ սեփական գրպանը լցնելու հաշվին:

Իսկ հարցին ի պատասխան, թե ո՞վ է նրա թիկունքում, որ կարողանում է նման ապօրինություններ անել, մեր աղբյուրն ասաց, որ Յուղուրջյանը տարիներ առաջ աշխատում էր Աբրահամյանների համար, ստիպում էր աշխատողներին գնալ ընտրության, զանգել, տեղեկացնել, թե ում են ընտրել: Իսկ թե ինչո՞ւ Յուղուրջյանին աշխատանքից չեն ազատում՝ մեր զրուցակիցը կարծում է, որ ստոմատոլոգները չեն բողոքում. գուցե այդ պատճառով:

«Մարդիկ կան, որ անցած տարիներին գործից դուրս են եկել՝ մենակ Յուղուրջյանի անտաշ վերաբերմունքի պատճառով, ոնց որ չոբան լինի, էնպես ա խոսում աշխատողների հետ, ոնց որ նրա ստրուկները լինեն»,- ասաց նա: