«Երևան Սիթի»-ում գտել են «ձևը» (լուսանկարներ)

Ազգային ժողովի Հանրապետական խմբակցության պատգամավոր Սամվել Ալեքսանյանին պատկանող «Երևան Սիթի» սուպերմարկետների ցանցում առևտուրը կարծես բնականոն հունի մեջ է մտել։ Ավելին՝ բանանի և ելակի գներն այստեղ այս օրերի համար ռեկորդային անկում են գրանցել՝ 1 կգ բանանը 850 դրամից իջել է 680-ի։

Գաղտնիք չէ նաև, որ ինչպես շատ ապրանքների, բանանի շուկայում ևս մենաշնորհային ընկերություն կա՝ «Քեթրին գրուպ»–ը, որի սեփականատերն ԱԺ պատգամավոր Միհրան Պողոսյանն է։ 

Շրջանառվող լուրերի համաձայն էլ, որոշ տնտեսագետներ «Ելք» խմբակցության ղեկավար Նիկոլ Փաշինյանին առաջարկել էին փակել «Քեթրինի Միհրանի» բանանի ու ցիտրուսների պահեստների ճանապարհները, որպեսզի բանանը խանութ չհասնի։

Այն, որ այսօր բանանները խանութում են և վաճառվում են, նշանակում է՝ ճանապարհներն այնուամենայնիվ չեն փակվել, սակայն չի բացատրվում, որ Միհրան Պողոսյանը մտավախություն ունի, թե հնարավոր է դեռ Էյֆորյայի մեջ գտնվող քաղաքացիները փորձեն պատժել իրեն՝ ապանքը չգնելով։ Ուստի չի բացառվում, որ բանանի ցածր գնի նպատակն ապրանքի արագ իրացումն է, որպեսզի չփչանա։

Թեև մյուս կողմից էլ' չի բացառվում, որ որոշ ապրանքատեսակների գներ իջեցնելով՝ «Երևան Սիթի»-ի սեփականատեր Ալեքսանյանը, բիզնեսը կորցնելու մտավախությամբ, փորձում է վերագտնել ու հետ բերել իր գնորդներին, ովքեր այս օրերին գրեթե չէին օգտվում ցանցի խանութներից։

Այդպես է դա, թե ոչ, դեռ կերևա։ Փաստն այն է, որ հեղափոխության թոհուբոհից փոքրիշատե դուրս եկած քաղաքացիները «Երևան Սիթի»-ների կողքից արդեն այնքան էլ անտարբեր չեն անցնում՝ փորձելով հնարավորինս օգտվել զեղչերից։

NEWSPRESS.am