«Չեմ կարծում, որ հայտնի կենդանու համառությամբ, պետք է գնալ և գլուխը խփել պատին»․ Շարմազանով

«Ես իմ դիրքորոշումը չեմ փոխել․ էն, ինչ ասել եմ՝ ուժի մեջ է»։ ՀՀԿ ԳՄ նիստից հետո լրագրողների հետ զրույցում ասաց ՀՀԿ խոսնակ Էդուարդ Շարմազանովը՝ անդրադառնալով մայիսի 8-ին կայանալիք վարչապետի ընտրություններին։ 

Նա նշեց, որ իր կարծիքը, մնում է նույնը (դեմ է Նիկոլ Փաշինյանի թեկնածությանը-հեղ․) և դա ուղղված չէ անձի դեմ, այլ քաղաքական է։

Ինչ վերաբերում է խմբակցության որոշմանը, ապա Էդուարդ Շարմազանովը նկատեց, որ ինչպես խոստացել են՝ Հայաստանը մայիսի 8-ին կունենա վարչապետ։

«Մեր ելույթում ամեն ինչ ասված է, մարդ կա կարդում է՝ չի տեսնում, մարդ կա, կարդում է՝ չի ուզում տեսնել․․․ Աստված տա, որ մեր բոլոր կառավարությունները արդարացնեն ժողովրդի հույսերը»,- ասաց նա և հավելեց․ «Ես իմ դիրքորոշումը չեմ փոխել, բայց չեմ կարծում, որ հայտնի կենդանու համառությամբ, պետք է գնալ և գլուխը խփել պատին։ Մենք երկիր չունենք ցնցումների տանելու»։

Նա այն կարծիքին չէ, որ մայիսի 1-իմ իրավիճակը շատ բարենպաստ էր, երբ ՀՀԿ-ն դեմ քվեարկեց։ Պարզապես հիմա խմբակցությունը այսպես է հարմար գտել։ Մյուս կողմից էլ նա նկատում է՝ իսկ ո՞վ է ասել, որ բոլորը կողմ են քվեարկելու։

«Խնդիրը 53 ձայն ապահովելն է, և դա կապահովվի»,-եզրափակեց Շարմազանովը։