«Տնօրենը մեզ փակել ա դպրոցում ու չի թողնում, որ դուրս գանք միտինգի». Արտաշատի թիվ 1 հիմնական դպրոցի աշակերտներ

Համաժողովրդական շարժման օրերին հանրակրթական դպրոցների և ուսումնական հաստատությունների մի շարք տնօրեններ իրենց պահվածքով ապացուցեցին, որ բոլորովին էլ չեն համապատասխանում իրենց դիրքին և կոչմանը:

Խոսքն այս դեպքում վերաբերում է Արտաշատի թիվ 1 հիմնական դպրոցի տնօրեն Թինա Մարգարյանին: Վերջինս, մայիսի 2-ին, երբ կաթվածահար էր եղել Հայաստանում գրեթե ամեն ինչ՝ սկսած օդանավակայանի գործադուլից մինչև համայնքներում միջպետական ճանապարհների փակվելը, տիկին տնօրենը որոշել է երեխաներին սպառնալիքների ներքո հավաքել դպրոցի դահլիճում և նրանց փակել այնտեղ՝ այսկերպ փորձելով զերծ պահել նրանց միտինգներին մասնակցելուց:

9-րդ դասարանցիներից մեկը NEWSPRESS.am-ի թղթակցին պատմեց, որ իր համադասարանցին՝ Շուշանիկը, զանգել է հորն ու ասել, որ «տնօրենն իրենց փակել է դպրոցի դահլիճում և չի թողնում, որ դուրս գան միտինգի»:

Տղայի խոսքով՝ աղջկա հայրը եկել է դպրոց, և նրա ու տնօրենի միջև վիճաբանություն է տեղի ունեցել:

Հոր այն հարցին, թե՝ ի՞նչ իրավունքով է իր երեխային փակել դպրոցում, տնօրենը պատասխանել է. «Ես դա արել եմ ձեր երեխայի անվտանգության համար»: Պատասխանը չի բավարարել ծնողին ու նա, վերցնելով Սերժ Սարգսյանի՝ պատից կախված նկարը, պատուհանից դուրս է շպրտել:

Եվ բանը հասել է դիվան բաշուն: Տնօրեն Թինա Մարգարյանը Շուշանիկի հորը դատի է տվել, թե իբր վերջինս վիճաբանության ժամանակ հարվածել է իրեն, որոշ ժամանակ անց, սակայն, հարցը «ջրել» են ու գնացել:

Թեմայի շուրջ պարզաբանում ստանալու նպատակով NEWSPRESS.am-ը կապ հաստատեց տնօրենի հետ, սակայն ընդունարանից պատասխանեցին, որ նա տեղում չէ, իբրև թե տարրականների մասնաշենքում է: Մեր թղթակիցը 3 անգամ նույն պատասխանը ստանալուց հետո, փորձեց կապվել Շուշանիկի հոր հետ, սակայն վերջինս նույնպես հրաժարվեց խոսել այդ թեմայի շուրջ՝ ասելով, որ «էդ հարցն արդեն փակված է»:

Լրագրողի հարցերից խուսափելով՝ տնօրենը, փաստորեն, ապացուցեց կատարվածի իսկությունը և կասկածի տակ դրեց իր մանկավարժի կոչումն ու, առավել ևս, դպրոցում տնօրենի պաշտոնը զբաղեցնելու իր իրավունքը: Ապացուցեց նաև այն, որ սպառնալիքներով ստիպել է ծնողին լռել, քանի որ առջևում տարեվերջյան քննություններ են: