Ո՛չ Սասուն Միքայելյանը, ո՛չ Նիկոլ Փաշինյանը չեն զանգել պարզելու, թե հայտարարության համար ի՞նչ հիմքեր կան․ Վիգեն Սարգսյան

Որևէ բան այսօր սահմանին չի փոխվել․ կուտակումները շարունակում են մնալ նույնը։

Այդ մասին լրագրողների հետ զրույցում ասաց Պաշտպանության նախարարի պաշտոնակատար Վիգեն Սարգսյանը։

Արձագանքելով «Ելք» խմբակցության պատգամավոր Սասուն Միքայելյանի այն հայտարարությանը, թե կուտակումներ չկան և նման հայտարարություններ արվում են ներքաղաքական զարգացումների կարգավորման համար, Վիգեն Սարգսյանը պատասխանեց, որ դա բացարձակ անարգանք է ոչ միայն Պաշտպանության նախարարի, այլ առաջնագծում կանգնած զինվորի համար:

«Դա ի՞նչ է նշանակում, որ ես կարող եմ հայտարարություն անել, որն իմ զինվորն իր աչքով տեսնում է, որ այդպես չէ, իսկ ես անում եմ հայտարարությու՞ն: Դուք պատկերացնու՞մ եք, ես ինչպես պետք է կարողանամ նայել իմ սպայի աչքերին, հրամանատարի աչքերին, եթե ինքը գիտի, որ ես սուտ եմ ասում, իսկ ես սուտ հայտարարություն եմ անում»,- ասաց Վիգեն Սարգսյանը՝ հավելելով, որ կուտակումների մասին հայտարարություն հերքելն անպատասխանատու է, քանի որ կարող է բանակի հայտարարությունների նկատմամբ առհասարակ անվստահություն առաջացնել հասարակության շրջանում։

«Ես այդպես էլ այդ օրերին չստացա զանգ ո՛չ Սասուն Միքայելյանից, ո՛չ Նիկոլ Փաշինյանից, ոչ մեկ ուրիշից, որ կզանգեր ու կհարցներ՝ այդ հայտարարության տակ ի՞նչ հիմքեր կան: Ես դա նորմալ եմ համարում, բայց հրապարակում հայտարարությունը սխալ եմ համարում: Բանակի հայտարարությունները չեն կարող պայմանավորված լինել ներքին զարգացումներով: Վիճակը սահմանին այնպիսին էր, ինչպիսին նկարագրված էր մեր հայտարարություններում, զինված ուժերը շարունակում են լիարժեք վերահսկել իրավիճակը և պատրաստ են ցանկացած գործողության հակահարված հասցնել»,- ասաց Վիգեն Սարգսյանը: