ՕԵԿ-ը դարձյալ երկունքի մեջ է․ Բաղդասարյանը թռիչքի պահին գետնին կզարնվի

«Օրինաց երկիր» կուսակցությունը դարձյալ երկունքի ցավերի մեջ է։ Կուսակցության նախագահ Արթուր Բաղդասարյանի դիրքորոշումների հետևանքով քաղաքական այս ուժը, որպես այդպիսին, վաղուց փակել է իր էջը։ Թեև մյուս կողմից էլ դիրքորոշում ասելը Բաղդասարյանի դեպքում սխալ կլինի, քանի որ քաղաքական դաշտում հաստատակամ դիրքորոշում ունեցող գործիչը երբեք չի վարկաբեկվի և խարանի իր ու իր կողմից ստեղծված կուսակցության անունը։

Իհարկե, Արթուր Բաղդասարյանը փորձեց տառացիորեն փրկել ՕԵԿ-ի անունը, սակայն միայն ներկայով ապրող ու սեփական շահերը պետական ու հասարարական շահերից վեր դասող գործիչը չէր կարող պատկերացնել, որ խնդիրը ո՛չ թե անվան մեջ է, այլ հենց իր ապաքաղաքական ու ոչ կառուցողական մոտեցումների։ Այնպես որ՝ վերածնված և «Հայկական վերածնունդ» անվանափոխված կուսակցությունն Ազգային ժողովի վերջին ընտրություններում խայտառակ պարտություն կրեց։

Հասկացա՞վ, թե՞ չհասկացավ Բաղդասարյանը, որ խնդիրը կուսակցության անվան մեջ չէ, բայց որոշեց դարձյալ անվանափոխել ու վերականգնել ՕԵԿ-ը։ Իհարկե, դրանից նրա համակիրների թիվը չավելացավ։

Ու երբ ամեն ինչ անցյալ էր թվում, ու կուսակցությունն արդեն հոգեվարքի մեջ էր, հանկարծ ծննդաբերելու մի հնարավորություն ևս տրվեց։ «Ելք» խմբակցության ղեկավար Նիկոլ Փաշինյանի «Թավշյա հեղափոխությունը» հղիացրեց ՕԵԿ-ին, ու հիմա նա երկունքի ցավերի մեջ է։

Արթուր Բաղդասարյանը հայտարարել է, թե ժողովրդի հետ է և սատարելու է ժողովրդի թեկնածուին՝ Նիկոլ Փաշինյանին։ Իհարկե, նա պատառ պոկելու ակնկալիքով է դիմում նման քայլի։ Կուսակցությունն այս անգամ էլ որոշել է փոխել ՕԵԿ ղեկավար կազմն ու մասնակցել խորհրդարանական արտահերթ ընտրություններին։ Ասում են՝ Հովհաննես Մարգարյանն ու նույնիսկ Բիշարյանը չեն լինելու ղեկավար կազմում։

Այս ամենը ցույց է տալիս, որ Բաղդասարյանը, այնուամենայնիվ, չհասկացավ, որ խնդիրը հենց իր մեջ է, այլ ոչ թե կուսակցության անվան ու իրեն հավատարիմ մարդկանց։

Եթե նույնիսկ չանդրադառնանք նրա անցած ճանապարհին, որտեղ միայն կեղտոտ հետքեր է թողել, ապա բավական է միայն հիշել վերջին դեպքը։ Մոռացա՞ն արդեն, որ դեռ մի 2 ամիս առաջ Բաղդասարյան Արթուրն ու իր կուսակցության նույն ղեկավար կազմը գլխապատառ գորգեր ու նկարներ էին գնել, կախել Եվրոպական ակադեմիայի պատերից, որ իրենց հարկի ներքո պատվով ընդունեն նրան ու լիզեն Սարգսյանի մարմնի համապատասխան հատվածն ու մտնեն այնտեղ։ Այսօր արդեն պարզվում է՝ նրանք դեմ են Սարգսյանին, ու «Մերժիր Սերժին» շարժման կողմնակիցն են և հիմա էլ Նիկոլ Փաշինյանին քսմսվում։

Արթուր Բաղդասարյանի քաղաքական կեղտոտ խաղերին արդեն բոլորն են տեղյակ, ու հիմա քծնելով Փաշինյանին ու ժողովրդավար երևալով՝ նա ոչ ոքի աչքին թոզ չի փչի, քանի որ ճակատի խարանը չի մաքրվել։ Բաղդասարյանը երևի չի հաշվարկել, որ, գնդակի նման, դաշտից դաշտ թռչելով՝ երկար չի ձգի ու մի օր թռիչքի պահին գետնին կզարնվի:

NEWSPRESS.am