Կստեղծվի Ռազմատեխնիկական գիտահետազոտական ինստիտուտ

Գործադիրին այսօրվա նիստում Պաշտպանության փոխնախարար Դավիթ Փախչանյանը ներկայացրեց «Ռազմատեխնիկական գիտահետազոտական ինստիտուտ» պետական ոչ առևտրային կազմակերպություն ստեղծելու մասին կառավարության որոշման նախագիծը:

Նա նշեց, որ նախատեսվում է ՀՀ ՊՆ-ի ենթակայությամբ ստեղծել Ռազմատեխնիկական գիտահետազոտական ինստիտուտ, որի նպատակն է լինելու ապահովել գիտատեխնիկական մշակումների խնդիրների իրականացումը և հայրենական արտադրության ռազմական նշանակության արտադրանքի արտաքին շուկաներում իրացնելու նախադրյալների ստեղծումը:

Վարչապետ Նիկոլ Փաշինյանը հետաքրքրվեց, թե ռազմաարդյունաբերական համալիրն աշխատում է և դա անո՞ւմ է մասնավոր ընկերությունների հետ համագործակցված, և այս կառույցը ստեղծում են, որպեսզի դադարեցնե՞ն մասնավորի հետ համագործակցությունը, թե՞ ծավալն այնքան մեծ է, որ պետք է նաև պետական համակարգում լինի նման կառույց:

Փախչանյանը պատասխանեց, որ ինստիտուտը մշակումներ իրականացնելու գործառույթ չունի. «Մենք պետք է հասկանանք` ինչ զորքերն ուզում են ունենալ, որն է ամենակարևոր խնդիրը, տեսնել՝ աշխարհում ինչ է կատարվում, որ ուղղություններն են զարգացնելու համար կարևոր»:

Որոշումն ընդունվեց: