«Մեր որդիների հոգիները կհանգստանան». սևազգեստ մայրերը Փաշինյանին հավատում են, բայց հետևողական կլինեն

Խաղաղ պայմաններում զոհված ժամկետային զինծառայող Տիգրան Օհանջանյանի մայրը՝ Գոհար Սարգսյանը, հուսով է, որ նոր կառավարությունն իր և մյուս սևազգեստ մայրերի հարցին լուծում կտա:

Կանայք համոզված են, որ իրենց որդիներին սպանել են: Նրանք NEWSPRESS.am-ի հետ զրույցում պատմում են, թե ինչպես տարիներ շարունակ թակելով պատկան մարմինների դռնեն ու արդարադատություն պահանջելով՝ ամեն կառավարության փոփոխության հետ ուզում են հավատալ, որ իրենց որդիներին սպանողներին կբացահայտեն:

Այս անգամ էլ նրանք հույսը կապում են նոր վարչապետ Նիկոլ Փաշինյանի հետ: Նրա առաջին քայլից գոհ են. «Մոտեցավ, բարևեց, խոստացավ հարցին լուծում տալ»,- ասում է Գոհար Սարգսյանը, ում նման խոստումներ շատ են տվել, բայց բոլորը սին են եղել: Այս անգամ նա ուզում է հավատալ, որ խնդիրը տեղից կշարժվի ու արդարադատություն կլինի:

«Ես որդուս մահը բացահայտելու ճանապարհին կորցրեցի ամուսնուս, արդեն 7 ամիս է»,-հուզված ասաց Գոհար Սարգսյանը: Նա նաև նշեց, որ այս հարցում վստահում է Փաշինյանին, բայց պետք է հետևողական լինի, որպեսզի գործը մինչև վերջ հանգուցալուծում ստանա:

«Ուզում եմ հավատալ, որ մեր որդիների հոգիները վերջապես կհանգստանան»: