Չլիներ տղաներին ազատելու գաղափարը՝ չէր լինի հեղափոխությունը․ դա հրատապ է, քան նախարարներ փոխելը․ Թամար Հովհաննիսյան

«Ոչ միայն «Սասնա Ծռերը», այլև բոլոր քաղբանտարկյալները պետք է ազատ արձակվեն»։ Այս պահանջով երեկ՝ մայիսի 11-ին,  Երևանում մի խումբ ցուցարարներ փակել էին Արշակունյաց պողոտան։ Նրանք վարչապետ Նիկոլ Փաշինյանից պահանջում էին անհապաղ փոխել դատախազներին և ազատ արձակել բոլոր քաղբանտարկյալներին, հակառակ դեպքում՝ իրենք կշարունակեն բողոքի ակցիաները։ Մասնավորապես, նրանք ժամանակացույց են ներկայացրել, որ եթե այսօր՝ մայիսի 12-ին, մինչև ժամը 3-ն ընկած ժամանակահատվածում խնդրի կարգավորման շուրջ որևէ տեղաշարժ չիլինի, ապա նրանք ժամը 15։00-ից դարձյալ կփակեն Արշակունյաց պողոտան։

Ակցիայի մասնակիցների մեջ էր նաև քաղբանտարկյալ Շանթ Հարությունյանի որդին՝ Շահեն Հարությունյանը և «Հանուն Հայաստան պետության» ճակատի անդամ, դերասանուհի Թամար Հովհաննիսյանը։

Նա սրտնեղած էր․

«Էս ինչի՞ հանկարծ ինձ լրատվամիջոցները հիշեցին, բա «թավշյա հեղափոխության» ժամանակ չէի՞ն հիշում․․․»,- ասաց Թամար Հովհաննիսյանը լրագրողներին, ովքեր ցանկանում էին ակցիայի կազմակերպման մասին մեկնաբանություններ ստանալ իրենից։ Այնուամենայնիվ, նա հայտնեց իր դիրքորոշումը ստեղծված իրավիճակի շուրջ։

Ըստ Թամար Հովհաննիսյանի' «Սասնա Ծռեր»-ի կալանքը որպես խափանման միջոց շռայլորեն օգտագործել են, որպեսզի ընդդիմադիր դաշտը մաքրեն։

«Սա բռնակալ, հանցագործ ռեժիմի ձեռագիրն է․․․․ մարդկանց դրել են․․․ ոչ մեկը չի ասում' գործը կարճեք, թող լինի դատավարություն, թող լինի արդար դատավարություն, քանի դեռ վճիռը չի կայացվել՝ նրանք անմեղ են, քանի որ գոյություն ունի անմեղության կանխավարկած»,- վրդովված ասաց Հովհաննիսյանը։

Նա նկատում է, որ պետք է տղաներին արագ ազատ արձակել, ու հենց այդ նպատակով իրենք հեղափոխության համար հոգի տվեցին։

«Եթե չլինեին տղաները, եթե չլիներ նրանց ազատ արձակելու գաղափարը, ապա չէր լինի բոլորիս երազած «թավշյա հեղափոխությունը», մենք հեղափոխություն ենք արել սրա համար, որ էս անարդարությունը վերանար, և սա չի կարող էսպես մնալ։ Էս ամենը պետք է բարձրաձայնվի, խոսվի դրա մասին, քանի որ սա ավելի հրատապ է, քան նախարարներին փոխելը»,-եզրափակեց Թամար Հովհաննիսյանը։

Նկատենք, որ Նիկոլ Փաշինյանն այս խնդրի շուրջ հայտարարել է, թե դատախազներին փոխելու իրավունքն իր լիազորությունների մեջ չի մտնում, և ինքը այստեղ չի կարող ոչինչ անել չի կարող։

Երկու օր առաջ ազատ արձակված քաղբանտարկյալ Անդրեաս Ղուսասյանն էլ վստահեցնում է, որ եթե վարչապետի լիազորությունները չեն ներում, ապա շարժումը կշարունակվի՝ այն ավարտված չէ։