«Չկա մեկը, ով կարող է ինձ պարտադրել հեռանալ»․ Ռուբեն Հայրապետյան

«ՀՖՖ նախագահի պաշտոնը հասարակական պաշտոն է: Ես ունեմ խնդիր, որը լուծելուց հետո կորոշեմ՝ ինչ կանեմ: Մտածում եք` ձեր կամ որևէ մեկի ասելո՞վ պետք է հեռանամ: Չկա մեկը, ով կարող է ինձ պարտադրել հեռանալ»:

Այսօր լրագրողների հետ հանդիպման ժամանակ ասել է Հայաստանի ֆուտբոլի ֆեդերացիայի նախագահ Ռուբեն Հայրապետյանը։

Պատասխանելով լրագրողների հարցին՝ Ռուբեն Հայրապետյանը նշել է, որ Դավիթ Յուրչենկոն պաշտոնապես համաձայնությունը տվել է միանալու հավաքականին: Ցուցակում ընդգրկված բոլոր ֆուտբոլիստների հետ նախապես զրուցել են, նախապես պայմանավորվել են, նախապես ստացել են իրենց համաձայնությունը և նոր ուղարկել են հրավեր:

Ինչ վերաբերում է Վարդան Մինասյանի կողմից Հայաստանի հավաքականը գլխավորելուն, ապա ՀՖՖ նախագահը նկատում է, որն իր և Մինասյանի միջև հատուկ պայմանավորվածություն չկա։

«Բացի այն, որ Վարդան Մինասյանը մարզիչ է, նա նաև ինձ շատ մտերիմ և հարազատ մարդ է: Ես նրա քավորն եմ: Ու մենք երբեք իրար հետ պայմաններով չենք զրուցել: Ես պարզապես նրան խնդրել եմ, որ այս ծանր ժամանակահատվածում հավաքականին հանի դժվար կացությունից: Մեր` միմյանց նկատմամբ հարգանքը շատ ավելին է, քան մարզիչ»,-նշեց Հայրապետյանը։

Անդրադառնալով Յուրա Մովսիսյանի` Հայաստանի ազգային հավաքական վերադառնալու հարցին և նրա հետ համագործակցությանը, ՀՖՖ նախագահն ինքը չի հետաքրքրվում, թե ովքեր են հավաքական հրավիրվել։ Իսկ Յուրան էլ իր համար ՀՀ բազմաթիվ ֆուտբոլիստներից մեկն է։

«Իմ անձնական կարծիքով` մի քանի ֆուտբոլիստ կար, ովքեր չպետք է հրավիրվեին հավաքական: Ամեն դեպքում մարզչին ազատություն է տրվել` որոշումներ կայացնելու: Բոլոր ֆուտբոլիստներն ինձ համար հավասար են: Ոչ ոք հատուկ չէ, Յուրան էլ առանձնահատուկ չէ: Նա, ով օգտակար կլինի մեր հավաքականին, պետք է նրան գնահատենք»: