«Սասնա Ծռերը պաշտպանեցին մեզ, հիմա մեր հերթն է պաշտպանել իրենց անարդարությունից»

Լիանա Ստեփանյանը ֆեյսբուքյան իր էջում գրել է. 

«Սասնա Ծռերի հարցը պետք է լուծվի օր առաջ: Մեր այսօրվա հաղթանակով մեծապես պարտական ենք այդ 30 տղաներին, որ իրենց վրա վերցրեցին ողջ ժողովրդի երկար տարիների կուտակված ցասումը գործող իշխանությունների նկատմամբ:

Մենք այսօր աշխարհին ցույց տվեցինք հայի իրական պատկերը, դիմագիծը: Հայերս միշտ եղել ենք, կանք ու կմնանք խաղաղասեր ժողովուրդ, մեզ համար անընդունելի է բռնությունը իր արտահայտման բոլոր ձևերով նույնիսկ «թշնամու» նկատմամբ, առավել ևս սեփական ազգի ներկայացուցիչների նկատմամբ:

Սակայն պարտավոր ենք ազնիվ լինել ինքներս մեզ հետ և հանրության առջև ու խոստովանել, որ մեզանից յուրաքանչյուրն էր պատրաստ զենք վերցնել ու հաշվեհարդար լինել ժողովրդին կեղեքող իշխանավորների հետ: Միթե մեզանում կա մեկը, որ ժամանակին չի մտածել և նույնիսկ բարձրաձայնել՝ քիչ է մնում զենք վերցնեմ ու գնդակահարեմ սրանց բոլորին, բայց շարունակել ենք դիմանալ, որպեսզի զենք չվերցնենք ձեռքներս:

Իսկ այս 30 քաջարիները, զինված ապստամբության գնալով, իրենց վրա վերցրեցին մեծ պատասխանատվություն ողջ ազգի փոխարեն:

Մենք ինքներս մեզ երբևէ հարցրել ենք, ինչու տղաները, փոխարենը հարձակվեին, ասենք օրինակ, Բաղրամյան 26-ի վրա, գրավեցին ՊՊԾ գունդը: Այո, ՊՊԾ գունդն իրենից ներկայացնում է մեծ զինանոց: Բայց արդյոք նրանք գրավեցին այդ գունդը մտքներին ունենալով զինված ապստամբության ընդարձակումը ժողովրդի միջոցով: Բնավ ոչ: Ուղիղ հակառակը, նրանք իրենց գործողություններով փորձեցին կանխել արյունահեղությունը, որ վաղ թե ուշ տեղի էր ունենալու:

Վստահ եմ, որ նրանք մարտի 1-ի օրինակը հիշողություններում վառ ունենալով, փորձեցին զրկել իշխանություններին ժողովրդի դեմ զենք կիրառելու, ջրցան մեքենաներ ու զրահատեխնիկա հանելու հնարավորությունից: 14 օր դիմակայեցին տղաները՝ հույսով, որ ժողովուրդը ոտքի կելնի ու իր արդարացի բողոքը կհայտնի գործող իշխանություններին: Սակայն ժողովուրդը խորապես չըմբռնեց տղաների գործողությունների իրական դրդապատճառն ու նպատակը: Շատերը քննադատեցին՝ որևէ հարց լուծելու համար զենքին դիմելու միջոցը անընդունելի համարելով մեր ազգի համար:

Իսկ տղաները մեզ ուզում էին ասել. «Ժողովուրդ, մի վախեցեք, ձեր դեմ օգտագործվելիք զենք, զինամթերքը մենք պաշարել ենք այստեղ, ոտքի ելեք, բոլորդ դուրս եկեք տներից, գնացեք բողոքեք, փողոց փակեք, երթ արեք, գործադուլ – դասադուլ արեք, ամեն օր ավելացեք ու ավելացեք, ցույց տվեք ձեր միասնականությունը, վճռականությունը, ԱՀՌԵԼԻ ՈՒԺԸ.....» - այն ինչ տեղի ունեցավ արդեն Նիկոլի առաջնորդությամբ օրեր առաջ....

Սասնա Ծռերը պաշտպանեցին ՄԵԶ, հիմա մեր հերթն է պաշտպանել իրենց անարդարությունից: