Նոր բացահայտումներ՝ մեզը թեյի գույնով փոխարինելու սկանդալային միջադեպի հերոսուհու «մութ» գործունեությունից

NEWSPRESS․am-ն ահազանգ է ստացել Մասիսի բժշկական կենտրոնից՝ տնօրեն Նունե Ավանեսյանի անօրինությունների մասին։

Մինչ ԲԿ տեղեփոխվելն Ավանեսյանն աշխատել է թիվ 9 պոլիկլինիկայում և, մամուլում շրջանառվող լուրերի համաձայն, ազատվել է այնտեղից՝ կաշառակերության ու անբարեխիղճ աշխատանքի համար։

Այժմ էլ, մեր աղբյուրի փոխանցմամբ, նույն գործելաոճը շարունակում է նոր աշխատավայրում՝ արդեն տնօրենի կարգավիճակով։ Աշխատակիցների կողմից իր դեմ ուղղված ընդվզումներին ու դժգոհություններին Ավանեսյանն արձագանքում է, թե «իմ դեմ խաղ չկա, ես Գագիկ Հարությունյանի բարեկամն եմ (նկատի ունի ՍԴ նախկին նախագահին-հեղ․)»։

Նա աշխատավայրում իր շուրջը «բարեկամական մթնոլորտ» է ստեղծել․ մեզ հասած տեղեկություններով՝ դեռ մեկ տարի էլ չկա, ինչ տնօրեն է նշանակվել, բայց արդեն հասցրել է մի քանի աշխատողի ազատել և նրանց փոխարեն նշանակել իր ծանոթ-բարեկամներին՝ առանց թափուր տեղ հայտարարելու, ինչն անօրինական է։

Խոսակցություններ կան նաև, որ աշխատանքի են անցնում նաև գումարով՝ կաշառքով։
Մեր աղբյուրի համաձայն՝ բուժքույրերն ազատվել են ատեստացիայի արդյունքում, որը դարձյալ անցկացվել է անօրինական ճանապարհով։ Ասում են՝ տնօրենը սպառնացել է որոշ բուժքույրերի, որ եթե իրենց կամքով աշխատանքից հեռացման դիմում չգրեն, ապա ինքը նրանց կազատի։

Բուժաշխատողները դժգոհում են նաև աշխատավարձի ուշացումից։ Նրանք վստահեցնում են նաև, որ Ավանեսյանը մանկաբարձ-գինեկոլոգ Մհեր Ենգիբարյանի հետ միասին փոշիացնում է պետության փողերը։

Մասնավորապես, ինչպես մեզ տեղեկացրին, կառավարությանն են ներկայացվում պետպատվեր համավճար ծառայության հայտեր, սակայն իրականում հիվանդը պետպատվերի ախտորոշումներին չի համապատասխանում, և կառավարությունից ստացված գումաներն Ավանեսյանն ու բժիշկ Ենգիբարյանը գրպանում են, իսկ հիվանդին բուժում վճարովի հիմունքներով։

Մեր աղբյուրի համաձայն՝ կառավարությունից փողեր են լվացվում նաև Շտապօգնության կանչերի միջոցով։ Գրանցվում են իրական թվից ավելի կանչեր․ այսինքն՝ կանչերի թիվն ուռճացվում է և ավելի շատ ֆինանսավորվում։

Բժիշկները նեղսրտած են․ «Եթե Ավանեսյանին չի հետաքրքրում հիվանդանոցի ճակատագիրը, ապա մենք չենք կարող նույնն ասել։ Մենք չենք ուզում անգործության մատնվել, իսկ Ավանեսյանի քայլերն ամբողջովին տանում են լուծարման, առանց այն էլ հիվանդանոցը պարտքեր ունի ու փակման եզրին է»,- ասացին մեզ հետ զրույցում։

Մեր զրուցակիցների խոսքով՝ բժիշկ Ենգիբարյանը «Սայտոտեք» դեղորայքային միջամտությամբ ծննդալուծումներ է իրականացնում՝ վտանգելով կանանց առողջությունը։ Մինչդեռ, առանց հատուկ ցուցումների, չի թույլատրվում օգտագործել «Սայտոտեք» դեղամիջոցը, քանի որ այն արյունահոսություն է առաջացնում։

Որոշ տեղեկություններով՝ Մհեր Ենգիբարյանը հիվանդանոցում իրականացնում է նաև քաղցկեղով հիվանդների վիրահատություն, ինչը ևս անօրինկան է․ նման վիրահատությունները կատարվում են Ֆանարջյան ինստիտուտում։

Հիշեցման կարգով նշենք, որ Նունե Ավանեսյանը հանրությանը հայտնի է դարձել հայտնի թեյի և մեզի հետ կապված պատմությունից հետո, երբ թեյի գույնով փոխարինվել էին մեզի անալիզները։ Որոշ բուժքույրերի խոսքով՝ դա միտումնավոր է արվել, որպեսզի մի քանիսին կարողանա ազատել աշխատանքից (բաժանմունքի 15 աշխատողից 8-ը ազատվել են)։ 

Նկատենք նաև, որ մեր զրուցակիցներն առաջիկայում պատրաստվում են բաց նամակով ու ապացույցներով ներկայացնել իրենց փաստարկները։