Իշխանափոխությունը, մեր պաշտոնին վնաս չէ․ Տարոնի «քարտ բլանշ»-ն ու գլխավոր դատախազի «անկախությունը»

Ո՛չ ՀՀ գլխավոր դատախազ Արթուր Դավթյանը, ո՛չ էլ Երևանի քաղաքապետ Տարոն Մարգարյանը չեն պատրաստվում հրաժեշտ տալ իրենց պաշտոններին։

Գործադիր իշխանության փոփոխությունը գլխավոր դատախազն իր հրաժարականի համար հիմք չի համարում, քանի որ դատախազությունն անկախ մարմին է։

Արթուր Դավթյանն այս մասին ասել է լրագրողների հետ զրույցում։ Իսկ մամուլում շրջանառվող մեկ այլ տեղեկությունների համաձայն էլ՝ Սերժ Սարգսյանը Տարոն Մարգարյանին «քարտ բլանշ» է տվել։ Սարգսյանը նրան, նաև մի շարք ընտրովի այլ պաշտոնյաների ասել է, որ հրաժարական չտան` շարունակելով պաշտոնավարումը:

Չի բացառվում, որ հենց դա է պատճառը, որ չնայած արդեն մի քանի օր է՝ ցուցարարները փակում են փողոցներն ու պահանջում թե՛ Տարոն Մարգարյանի, թե՛ Արթուր Դավթյանի հրաժարականը, սակայն ո՛չ առաջինը, ո՛չ էլ երկրորդը չեն պատրաստվում հրաժարական տալ։ Նրանք նույնիսկ մինչ օրս նաև ցուցարարների հետ առճակտման չեն գնացել և չեն լսել նրանց։

Այստեղ ուշագրավ է նաև նորընտիր վարչապետ Փաշինյանի լռությունը։

Թեև արդեն մի քանի օր է՝ ցույցերը շարունակվում են, և կան դժգոհություններ, սակայն նա ի պաշտոնե չի արձագանքել քաղաքացիների պահանջներին և չի հանդիպել նրանց հետ։

Ավելի ուշ, արդեն Փաշինյանի՝ Սոչի մեկնելուց հետո, ՀՀ տարածքային կառավարման նորանշանակ նախարար Սուրեն Պապիկյանը ֆեյսբուքյան «լայվով» (որը վերջին ժամանակի «բրենդ» է դարձել), հայտարարել է, թե «փողոցը փակելու պրակտիկայով հարցեր պետք չէ լուծել» և կոչ է արել դադարեցնել ակցիաները։

Ու թեև ցույցերը մինչ օրս շարունակվում են, երբ Փաշինյանն արդեն վերադարձել է Սոչիից, սակայն նա դեռ այդպես էլ չի հանդիպել ցուցարարներին։

NEWSPRESS.am