Պաշտոնյաների անփութության հետևանքով պետությանն ավելի քան 63 մլն դրամի վնաս է պատճառվել

ՀՀ գլխավոր դատախազությունում շարունակվում են ՀՀ վերահսկիչ պալատի հաշվետվությունների ուսումնասիրությունները:

Ինչպես տեղեկացրին ՀՀ դատախազության հանրային կապերի բաժնից, ՀՀ ՎՊ խորհրդի` 2018թ. մարտի 19-ի որոշմամբ հաստատված հաշվետվության և դրանից ածանցվող համապատասխան նյութերի ու փաստաթղթերի ուսումնասիրության արդյունքում պարզվել է, որ 2016թ. և 2017թ. հունվար-նոյեմբեր ամիսների ընթացքում տաքսի ծառայություն մատուցող «Ս. Լ. Տ.» ՍՊԸ-ի և «Թ. Ա.» ՍՊԸ-ի ղեկավար աշխատակիցները և ընկերությունների հետ առնչություն ունեցող անձինք, ընկերությունների ավտոմեքենաների վարորդների կողմից ճանապարհային երթևեկության կանոնների խախտումների դիմաց վարչական պատասխանատվության ենթարկելու համար խախտում կատարած վարորդների վերաբերյալ ապացույցներ ներկայացնելու փոխարեն ներկայացրել են խախտումների հետ չկապված, գույք կամ եկամուտներ չունեցող ֆիզիկական անձանց տվյալներ: Արդյունքում ՀՀ ոստիկանության ՃՈ ծառայության աշխատակիցները թվով 6287 խախտումների համար նշանակված տուգանքների՝ ընդհանուր 47.512.800 ՀՀ դրամ գումարն արձանագրել են գույք կամ եկամուտներ չունեցող ֆիզիկական 2 անձի անվամբ: Իսկ վարչական ակտերով գումարների բռնագանձման վերաբերյալ կատարողական վարույթները ՀՀ արդարադատության նախարարության ԴԱՀԿ ծառայության աշխատակիցներն ավարտել են «Դատական ակտերի հարկադիր կատարման» մասին ՀՀ օրենքով նախատեսված՝ պարտապանի գույք կամ եկամուտներ չունենալու հիմքով:

Պարզվել է նաև, որ նույն սխեմայով, այսինքն գույք կամ եկամուտներ չունեցող 2 ֆիզիկական անձանց կողմից խախտումները կատարելու վերաբերյալ ապացույցներ ներկայացնելով՝ թվով 3016 խախտումների համար նշանակված՝ ընդհանուր 15.725.300ՀՀ դրամ գումար կազմող տուգանքների վճարումները չեն կատարել նաև ավտոմեքենաների սեփականատեր՝ տեսանկարա­հան­ման, լուսանկարահանման միջոցով ամրագրված ճանապարհային երթևեկու­թյան կանոնների խախտումների սուբյեկտ հանդիսացող անձինք:

Այսինքն տաքսի ծառայություն մատուցող նշված ընկերությունների ղեկավար աշխատակիցների և ընկերությունների հետ առնչություն ունեցող անձինք, ինչպես նաև ավտոմեքենաների այդ սեփականատերերը խաբեության եղանակով խուսափել են վարչական տուգանքները վճարելուց՝ դրանով պետությանը պատճառելով առանձնապես խոշոր չափերի վնաս: Իսկ պետական ծառայություն իրականացնող պատասխանատու պաշտոնատար անձինք, շուրջ 2 տարի մեկ ֆիզիկական անձի անվամբ ձևակերպելով բազմաթիվ վարչական իրավախախտումներ ու կատարողական վարույթներ, ծառայության նկատմամբ դրսևորել են անբարեխիղճ կամ անփույթ վերաբերմունք, որի հետևանքով անզգուշությամբ էական վնաս են պատճառել պետության օրինական շահերին՝ առաջացնելով այլ ծանր հետևանքներ:

Նկատի ունենալով, որ վերը նկարագրված արարքներում առերևույթ առկա են հանցագործության հատկանիշներ՝ ՀՀ գլխավոր դատախազության ավագ դատախազի որոշմամբ նշված դեպքերի առթիվ ՀՀ քրեական օրենսգրքի 184-րդ հոդվածի 2-րդ մասի 1-ին կետով և 315-րդ հոդվածի 2-րդ մասով հարուցվել է 4 քրեական գործ, որոնց նախաքննությունը հանձնարարվել է ՀՀ հատուկ քննչական ծառայությանը:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: