Մարիխուանան մանկական չարաճճի երազա՞նք, թե՞ նախընտրական խոստում

Երևանի քաղաքապետարանի դիմաց իր տեսակի մեջ առանձնահատուկ ակցիա է կազմակերպվել։ Մի խումբ քաղաքացիներ պահանջում են «մերժել» քաղաքապետ Տարոն Մարգարյանին, իսկ մեկ այլ խումբ նրանց հետ վեճի է բռնվել՝ պահանջելով «Քաղաքացիական պայմանագիր» կուսակցության անդամ Ալեն Սիմոնյանին:

Թեև արդեն իսկ ԿԸՀ-ն կազմել է արձանագրություն Ալեն Սիմոնյանին մանդատ տալու վերաբերյալ, սակայն բնակիչները, չգիտես ինչու, դեռ մտավախություն ունեն, որ Ալենը կդառնա քաղաքապետ։

Անկեղծության համար պետք է նկատենք, որ թե՛ առաջին և թե՛ երկրորդ դեպքում Ալեն Սիմոնյանի տարբերակն անհանգստացնելու տեղիք կտա, որի համար հիմք կարող է հանդիսանալ թեկուզ և այն, որ նա հայտարարել էր, թե մարիխունան հարկավոր է օրինականացնել։

 Նա, մասնավորապես, ասել էր․

«Ես վստահ եմ, որ մարիխուանայի օրինականացումը ժամանակի խնդիր է։ Օրինականացումը զուտ հոգեբանական և կարծրատիպային բնույթ ունի, այդ իսկ պատճառով հասարակության կողմից այս հայտարարությունները ճիշտ չեն ընկալվում»:

Նա հայտարարել է նաև, որ մարիխուանայի վաճառքով մեծ գումարներ են շրջանառվում, որով, իբր, կարելի է լցնել բյուջեն։

Իհարկե, որպես պատգամավորի թեկնածու, Սիմոնյանը կարող էր ավելի լուրջ տեսլական առաջարկել, որը կլիներ համոզիչ, հեռանկարային և որից կբացակայեր հանցագործ տարրը։ Սակայն նրա մտահորիզոնը սահմանափակվել է միայն մարիխուանայի բիզնեսը օրինականացնելով, որը, իհարկե, հեռանկար չունի ոչ միայն այդ բիզնեսով զբաղվողի, այլև այն օգտագործողի համար․․․

Սա երևի Ալեն Սիմոնյանի մանկական չարաճճի երազանքներից մեկն է եղել ու հիմա հարմար առիթ է գտել այն կյանքի կոչելու համար։ Թեև մյուս կողմից էլ չի բացառվում, որ խորհրդարանական ընտրությունների ժամանակ Սիմոնյանի ընտրողները եղել են թմրամոլները, և մարիխուանան օրինակացնելն էլ եղել է նրա նախընտրական խոստումը։

NEWSPRESS.am