Ճանապարհ փակելն այլևս օրինական չէ՞

Հայաստանում ապրիլյան «ճանապարհփակոցիից» հետո, նոր կառավարությանն այլևս կարծես թե ցանկալի չեն փակված փողոցներ:

Այս օրերին, երբ «Սասնա Ծռեր» խմբի դեմ դատ է գնում, դատական նիստի օրերին խմբի համակիրները փակում են Արշակունյաց պողոտան. դատը տեղի է ունենում Շենգավիթ վարչական շրջանի ընդհանուր իրավասության դատարանում, որը գտնվում է Պանթեոնի հարակից տարածքում: Եվ ամեն անգամ, դատական նիստերին` Արշակունյաց պողոտան փակվում է:

Եթե մինչև երեկ ճանապարհ փակելն «օրինական էր», ապա այսօր` ոչ:

Տարածքային կառավարման և զարգացման նախարար Սուրեն Պապիկյանը կոչով դիմել էր հատկապես կաթի մթերման խնդիրներով ճանապարհ փակողներին, թե՝ ճանապարհները մի՛ փակեք, այս կառավարությունը հասանելի է, ճանապարհ փակելու կարիք չկա:

Սա նաև ուղերձ էր մյուս ճանապարհ փակողներին, որ ճանապարհ փակելը ներկայիս կառավարության նախկին «բրենդն» էր և այլևս այն գործածական չէ, նոր կառավարությանը պետք են բաց ճանապարհներ:

Այսօր կրկին Արշակունյաց պողոտան փակել են «Սասնա Ծռեր» խմբի համակիրները, ովքեր պահանջում են ազատ արձակել խմբի անդամներին, այստեղ արդեն ոչ այն է նրանց ազատ արձակելը` միմիայն նոր վարչապետի հրահանգով, ոչ էլ դատարանը կարող է ազատ արձակել, քանի որ «Սասնա Ծռեր» խմբի անդամների դեմ մի քանի մեղադրանք կա:

Այնպես որ՝ ներկա կառավարությունը հայտնվել է իր նախկին «բրենդի» թակարդում:
Իսկ այժմ ինչպե՞ս վարվել` թողնել, որ Արշակունյաց պողոտան փակվի՞ անորոշ ժամանակով, թե՞ ցրել հավաքվածներին և բացել Երևանի կարևոր ճանապարհներից մեկի երթևեկությունը, որը կաթվածահար է եղել:

Ինչպես ասում են` այս է խնդիրը:

Իհարկե, նոր կառավարությունը երևի չէր էլ մտածում, որ լավ աշակերտներ կունենա, և իր հետքերով կգնան ուրիշները: Երբ իրենք էին ճանապարհները փակում` կարելի էր, իսկ մյուսների պարագայում, ինչպես նախարար Պապիկյանն էր հորդորում` արդեն այնքան էլ ճիշտ մոտեցում չէ:

Կաթի, զինկոմիսարիատների կրճատված աշխատակիցների խնդիրները գուցե լուծում ստանան, սակայն «Սասնա Ծռերի» գործն, ինչպես նախկին, այնպես էլ հատկապես ներկա ղեկավարության կոկորդին է:

Դեռևս նոր կառավարությունը «Սասնա Ծռերի» կողմնակիցներին ոչինչ չունի առաջարկելու, բացի փողոց չփակելու հորդորից, սակայն, ինչպես ասում են, շնորհակալությամբ խնդիրը չես լուծի:

NEWSPRESS.am