Եթե կառավարությանը հնարավորություն չի տրվելու, մեր այստեղ լինելն իմաստ չունի. Փաշինյանը կոչ է անում դադարեցնել բողոքի ակցիաները (վիդեո)

Մենք Հայաստանում իրականացրել ենք սիրո և համերաշխության հեղափոխություն: Ժամանակն է այդ հեղափոխության խնդիրներն ու նպատակներն իրականացնելու և ՀՀ քաղաքացիներին զգալ տալու, որ իրենք են իրականում տերը և իշխանությունը Հայաստանի Հանրապետությունում: Այդ մասին ֆեյսբուքյան ուղիղ եթերում հայտարարեց վարչապետ Նիկոլ Փաշինյանը: 

««Իմ քայլը» ակցիայի նպատակը եղել է ՀՀ քաղաքացու հաղթանակը: Ուզում եմ արձանագրել, որ ՀՀ քաղաքացին հաղթել է, առանցքային արդյունքը ոչ թե այն է, որ ես ընտրվել եմ վարչապետ, այլ այն, որ ինքն է որոշել, թե ով լինի ՀՀ վարչապետ»,- նշեց վարչապետը: 

Նա նկատեց, որ երբ իրենք փակում էին փողոցները, գիտեին, որ ՀՀ-ում չկա իշխանություն, որն ի վիճակի է լսելու քաղաքացիներին, ապրելու քաղաքացիների հոգսերով, լուծել նրանց խնդիրը, պաշտպանել նրանց իրավունքները:

«Հիմա երբ Հայաստանում հաստատված է իշխանություն՝ ժողովրդի տված մանդատով, որը ժողովրդի խնդիրները լուծելու համար է հասել իշխանության, հասկանալի չէ, որ մենք ամենօրյա ռեժիմով փակում ենք ճանապարհները և իրականացնում ենք քաղաքացիական անհնազանդության գործողություններ: Իսկ Հայաստանում այսօր հաստատված է քաղաքացու իշխանությունը: Հետևաբար՝ ու՞մ ենք մենք անհնազանդություն հայտարարում: Ինքներս մե՞զ: Սա ճիշտ մոտեցում չէ»,- նշեց Փաշինյանը: 

Նա տեղեկացրեց, որ կառավարության նամակների բաժնում այս օրերին ստացվում է այնքան նամակ, որքան նախկինում ստացվել է մեկ ամսում: 

Ըստ Փաշինյանի՝ կառավարությունը պետք է հնարավորություն ունենա խնդիրները դասավորելու՝ ըստ հրատապության և հերթով զբաղվի այդ խնդիրների լուծմամբ: 

«Այժմ կոչ եմ անում ՀՀ բոլոր քաղաքացիներին՝ այդ հնարավորությունը տալ կառավարությանը, որովհետև եթե այդ հնարավորությունը չի տրվելու, մեր այստեղ լինելը զրկվում է որևէ իմաստից»: 

Նա կոչ արեց 15:00-ից դադարեցնել անհնազանդության ակցիաները, բայց կոչ արեց չհամակերպվել խնդիրների հետ ու չգնալ-տներում չնստել:

Մանրամասները՝ տեսանյութում