ԵՊՀ ռեկտոր Արամ Սիմոնյանը հրաժարակա՞ն կտա

Վերջին տարիներին Երևանի պետական համալսարանում մթնոլորտն այդքան էլ առողջ չէ։ Ու այդ անառողջությունը կապված է ԵՊՀ ռեկտոր Արամ Սիմոնյանի, կուսակցականացված ուսխորհրդների ու ԵՊՀ-ում տիրող շատ մեծ բացերի հետ։ Այդ ամենն ավելի զարգացավ հատկապես «տարկետում լինելու ա» ուսանողական շարժման ժամանակ, որից հետո կրքերը նույնպես չհանդարտվեցին։ 

Բարձրացվեցին խայտառակ, բայց կարևոր զուգարանի թղթի, օճառամանների օդորակիչների ու գրադարաններում գրքերի բացակայության խնդիրները։ Մեծ հաշվով այս ամենից կարելի է ենթադրել, որ ուսանողների վճարած վարձերը, պետության կողմից տրամադրված գումարները բնավ էլ չեն ծառայում այն ամենի համար, ինչի համար որ դրանք պիտի ծառայեն։

Սրա հետ զուգահեռ ուսանողական «Ռեստարտ» ընկերությունն սկսեց ներկայացնել նաև ԵՊՀ-ի կատարած ծախսերն, ու արդյունքում ստացվում է, որ ԵՊՀ-ում գումարներն իրոք մի տեղ անհայտանում են։

«Թավշյա հեղափոխության» ժամանակ ուսանողներն ունեցան իրենց մեծ դերակատարումը։ Ու այդ ժամանակ հստակ էր, որ իշխանությունների տապալումից կարճ ժամանակ հետո կլուծվեն նաև Մայրն բուհում առկա խնդիրները։

NEWSPRESS.am-ի տեղեկություններով՝ ԵՊՀ ռեկտոր Արամ Սիմոնյանն առաջիկա օրերին հրաժարական կտա։ Այս հրաժարականը կլինի տրամաբանական, քանի որ թե՛ ուսանողության, և թե հասարակության մեջ շատերի համբերության բաժակը լցվել է, քանի որ ԵՊՀ-ն իր վարկանիշը զգալիորեն իջեցրել է, իսկ Մայր բուհում օր օրի խնդիրներն ավելանում ու ջրի երես են դուրս գալիս։