12-ամյա կրթություն. հիմա հետ գնալը ճիշտ չէ. կրթության փորձագետ

«Այս պահին աննախադեպ հանրային հետաքրքրվածություն կա կրթության հարցերի նկատմամբ։ Սակայն այս պահին կան որոշակի բարդություններ, քանի որ անհատներ, խմբեր փորձում են իրենց շահերն առաջ մղել՝ մի մասը խորհրդային համակարգի կողմնակից են, մի մասն ավելի կապիտալիստական, մյուս մասն էլ ավագ դպրոցներն է ուզում վերացնի»: Այսօր լրագրողների հետ հանդիպմանն ասաց կրթության փորձագետ, ԵՊՀ դասախոս Սերոբ Խաչատրյանը:

Նրա խոսքով՝ ԿԳՆ-ի համար հիմա իսկապես բարդ է լինելու, այս բազմազանության և իրարամերժ առաջարկների մեջ գտնել խելամիտ լուծումներ։ Այստեղ իրենց դերը պետք է ունենան փորձագետներն ու նախարարության պաշտոնյաները, և որ ամենակարևորն է, պետք է մարդկանց հետ աշխատել»,- նշեց Խաչատրյանը։

«Հայաստանի կրթական համակարգը վերջին տարիներին լճացել էր ու շատ վատ էր արձագանքում խնդիրներին: Նախորդ կառավարման համակարգի ամենամեծ թերությունն այն էր, որ մարդկանց հետ շատ քիչ աշխատանք էր տարվում»,- ասաց Ս. Խաչատրյանը:

Ըստ նրա՝ գրվում էին հայեցակարգեր, օրենքներ, ռազմավարություններ, դրանք մի երկու անգամ ձևական հանրային քննարկման էին ներկայացվում, վերջին պահին ինչը պետք էր, հարմարեցնում էին իրենց շահերին, հետո գնում էր ԱԺ՝ այն տեսքով, ինչպես իրենց ձեռք էր տալիս»։

Սերոբ Խաչատրյանն անդրադարձավ նաև դպրոցական 12-ամյա կրթությանը, նշեց, որ հիմա հետ գնալը ճիշտ չէ, բազմաթիվ խնդիրներ են առաջանալու՝ սկսած մարդկանց կրճատումներից, վերջացրած, որ ծրագիրը պետք է խցկել տասը տարում։