Հայկական միկրոավտոբուսներին չեն թույլատրել անցնել ՌԴ սահմանը. ահազանգ

Այսօր ահազանգ է ստացվել NEWSPRESS.am-ի խմբագրություն, որ ռուս-վրացական սահմանին շուրջ 600 մարդ չի կարողացել հատել սահմանը, քանի որ կանոնավոր ուղևորափոխադրողները չունեն համապատասխան փաստաթուղթ` ՌԴ-ում արդեն խստացված ռեժիմով մուտք գործելու համար:

Ուղևորափոխադրողներից մեկը նշեց, որ մրցույթ էր հայտարարված տրանսպորտի, կապի և ՏՏ նախարարության կողմից կանոնավոր ուղևորափոխադրողների համար, և մրցույթը շահած ընկերություններին պետք է տրամադրվեր համապատասխան փաստաթուղթ, սակայն նախարարության անգործության պատճառով որևէ փաստաթուղթ արդեն երկու տարի է՝ չի տրվել: Այսօր արդեն ՌԴ-ն արգելել է առանց համապատասխան փաստաթղթի մուտքը ՌԴ. սահմանին կուտակումներ են:

NEWSPRESS.am-ն օրերս անդրադարձել էր հունիսի մեկից ՌԴ-ի կողմից ուղևորափոխադրման կանոնների խստացմանը և դրա հետ կապված ուղևորափոխադրողների հնարավոր խնդիրներին: Թեև դեռևս ժամանակ կա, սակայն այսօր արդեն չեն թույլատրում ոչ կանոնավոր ուղևորափոխադրողներին հատել Վրաստան-ՌԴ սահմանը:

Օգտատեր Գրիգոր Ղազարյանը ֆեյսբուքյան իր էջում գրառումն է կատարել.

«Ժամը 08:00 դրությամբ Վերին Լարսի անցակետում արդեն չեն թույլատրում հայկական ոչ կանոնավոր ուղևորափոխադրող ավտոբուսների և միկրոավտոբուսների մուտքը Ռուսաստան: Չնայած նրան, որ բազմիցս զգուշացրել էին, որ օրենքը գործելու է Հունիսի 1-ից:

Այդ մասին անգամ պաշտոնապես ասված է ՀՀ տրանսպորտի նախարարության կայքում: Դեռ ավելին, երբ 10 օր առաջ ահազանգել նախարարության համապատասխան բաժին, ինձ մեր թավյա հեղափոխության տրամաբանությամբ պատասխանել էին, թե Դուխով գնացեք, նման փաստաթուղթ դեռ չենք ստացել ՌԴ համապատասխան մարմիններից, և Ձեզանից ոչ ոք չի կարող Ոչինչ պահանջել.

Հարգելի տրանսպորտի նախարարություն, Դուխովը Ռուսաստանում չի անցնում, լավ կլինի ավելի գործնական քայլեր մտածեք:

Այս պահին Վերին Լարսի անցակետում 15-ից ավելի միկրոավտոբուս և ավտոբուս հետ են վերադարձնում Հայաստան: Եթե կան տուժած այլ ընկերություններ, գրեք տեսնենք ինչ ենք անում. Շնորհակալություն: Հայրենիք Տուր»:

Նշենք, որ՝ ուղևորափոխադրող այն ընկերությունները, որոնք 2018 թվականի հունիսի 1-ից կցանկանան իրականացնել Հայաստանի Հանրապետությունից դեպի Ռուսաստանի Դաշնություն և հակառակ ուղղությամբ միջպետական ոչ կանոնավոր ուղևորափոխադրումներ, պետք է «Ավտոմոբիլային տրանսպորտի մասին» ՀՀ օրենքի 16-րդ հոդվածի պահանջներին համապատասխան՝ ՀՀ տրանսպորտի, կապի և տեղեկատվական տեխնոլոգիաների նախարարությունից ստանան թույլտվություններ, այլապես նրանք չեն կարող հատել սահմանային անցակետը:

Այսօր Լարսի անցակետում կուտակված միկրոավտոբուսները կա՛մ պետք է վերադառնան, կա՛մ պետք է հատուկ հրահանգ լինի, ըստ ամենայնի, պետք է վերադառնան Հայաստան:

Հիշեցնենք, որ հունիս-հուլիս ամիսներին ՌԴ-ում տեղի են ունենալու աշխարհի ֆուտբոլի խաղերը, և ըստ այդմ, խստացվել է ուղևորափոխադրումների խնդիրը, հատկապես այն քաղաքներում, որտեղ կայանալու են խաղերը, հայ ուղևորափոխադրողները հատուկ փաստաթղթեր պետք է ունենան, քանի որ անցնելու են նշված քաղաքներով: