Փրկեք հայրենիքը «կրկեսացումից», չստացվի հանկարծ՝ կրկեսը գնաց, ծաղրածուները մնացին

NEWSPRESS.am-ի հիմնադիր-տնօրեն, միջազգային երկու խոշոր լրատվական կազմակերպությունների՝ SEEMO-ի և IPI-ի խորհրդի անդամ Արմենուհի (Արիանա) Հովսեփյանը ֆեյսբուքյան իր էջում գրել է. 

«Մեծարգո և հարգելի պարոն վարչապետ (կասեր մեծարգո և հարգելի ոստիկանապետ Օսիպյանը),

Մեր՝ Ձեր կողմից ընտրված նախարարների արդեն իսկ թույլ տրված սայթաքումների մասին հրապարակումներից հետո մեզ մեղադրեցիք, այո, Դուք, առնվազն Ձեր թիմը, որոնց պատասխանատուն միմիայն Դուք եք, հանրապետականին «ծախվելու» մեջ: 

Փոքր-ինչ խոհեմություն ունենալու կոչ եմ անում և մեր կայքի՝ ՀՀԿ-ի իշխանության օրոք արված հրապարակումներին ծանոթանալ եմ առաջարկում (չնայած Ձեր թիմը կարծես թե այնքան էլ ընթերցասեր չէ. դա արդեն իսկ ակնհայտ է): Սփյուռքի նախարարը Ձեր ականջին կհաստատի:

Պարոն Փաշինյան, հենց նույն հրապարակումների պատճառով Հանրապետականի երախը մշտապես բաց է եղել ինձ կուլ տալու համար: Դուք էլ հո գիտե՛ք՝ ի՞նչ է նշանակում քաղաքական հայացքների ու հրապարակումների պատճառով հետապնդվելը: Ամեն դեպքում, եթե խոհեմություն ցուցաբերելու և հրապարակումներին հետևելու կոչս էլ անտեսեք, գոնե հարցրեք դրանց մասին Ձեր հանրապետական ընկեր/գործընկերներին՝ վարչապետ դարձած նախագահ Սարգսյանից սկսած, առաջին փոխվարչապետ դարձած վարչապետից սկսած՝ մինչև աշոտյաններ, շարմազանովներ, կոստանյաններ: Ես մշտապես նրանց կոկորդին կանգնած փուշ եմ եղել: Կասեն: 

Հիմա` Ձեր մասին:

Մրից դուրս եկանք, մրջո՞ւրն ընկանք, պարոն Փաշինյան: 

Երրորդ անգամ եք գալիս կառավարություն՝ որպես վարչապետ, պարոն Փաշինյան, և արդեն ետնամուտքից եք դուրսուներս անում: Բա Դուք ժողովրդի թեկնածուն չէի՞ք: Ի՞նչ փոխվեց: Արդեն խուսափո՞ւմ եք Ձեր ժողովրդից: Ազնիվ չէ, պարոն Փաշինյան, ազնիվ չե՛ք: Մի՛ փախչեք սեփական ժողովրդից, Ձեր այդ աթոռին հասցրած ժողովրդից, Ձեզ հետ հույսի վերջին մնացորդները կապող ժողովրդից: Նախորդների համար այդ նույն փախուստը կործանարար եղավ: Դուք ինքներդ կործանեցիք փախչողներին: 

Ձեր կադրերին էլ նայեք, պարո՛ն վարչապետ: Ձեզ չե՞ն հիշեցնում նախկին նախարարներին, ասենք, Ալթունյանին, Ասատրյանին, Հակոբյան Հրանուշին, մեծ հաշվով, բոլորին, չնչին բացառություններով: Հիշեցնում են, պարոն Փաշինյան, և որ ամենասարսափելին է՝ Դուք էլ սկսում եք Սերժ Սարգսյանին հիշեցնել: 

Պարոն Փաշինյան, մի վերջին հորդոր ու ինչպես Դուք եք ասում՝ պահանջ: Սիրո և համերաշխության մթնոլորտում մի՛ սպառնացեք Ձեր հեռանալով: Սիրո մթնոլորտում սպառնալիքը տեղ չունի, մի՛ պահանջեք, որ մարդիկ դադարեցնեն իրենց անհնազանդությունները, չէ՞ որ ցանկացած վերք մինչև բուժվելը ցավելու հատկություն ունի: Չէ՞ որ, Դուք եք ասել, որ ձեռքերը ծալած չնստեն ու տուն չգնան: Ինչպե՞ս պայքարեն, երբ Ձեզ հանդիպելն այլևս անհավանական է դառնում, իսկ նամակներ ուղարկելուց մարդիկ արդեն զզվել են: 

Պարոն Փաշինյան, սա պետություն է, հայրենիք, որը, դասականը կասեր, կրկեսի է վերածվում: Փրկեք հայրենիքը «կրկեսացումից», չստացվի հանկարծ, թե՝ կրկեսը գնաց, ծաղրածուները մնացին:

Հա,  չմոռանամ, ծաղրածուների մասին՝ հանրապետականներն ընդլայնում են բիզնեսը, տարիներ շարունակ երկիրը կեղեքած հանրապետականները, հարկերից խուսափած հանրապետականները, Ազգային ժողովում մանդատ ունեցող հանրապետականները: Հիմա՝ այս օրերին, Ձեր իշխանության, Ձեր քթի տակ: 

Հույսերս մեծ են, պարոն Փաշինյան, անսահման մեծ, որ գալու է օրը, երբ Դուք ապացուցելու եք, որ մտավախություններս զուր են, որ ամուր սահմաններով, տնտեսապես հզոր, սոցիալապես ապահով, կրթական բարձր ցենզով երկիր ենք դառնալու, Դո՛ւք եք դարձնելու, պարոն Փաշինյան ու ես սեղմելու եմ Ձեր ձեռքն ու ներողություն եմ խնդրելու վախերիս համար: 

Հարգանքով ու հույսով՝ 

Ձեր կոլեգա՝ Արմենուհի (Արիանա) Հովսեփյան»: