ՀՀԿ գնալու և վերադառնալու ժամանակը

Այսօր ԱԺ ՀՀԿ խմբակցության պատգամավորներ Շիրակ Թորոսյանը և Արթուր Գևորգյանը դուրս եկան խմբակցությունից (Արթուր Գեւորգյանը՝ նաև ՀՀԿ-ից), և դա սպասելի էր: ՀՀԿ-ն ժամանակի ընթացքում վերածվել էր մի կուսակցության, որտեղ հավաքվել էին համատեղ լինելու համար: Լինելով իշխանության գլուխ՝ ՀՀԿ-ն իր անդամների միջոցով կառավարում էր երկիրը: Ինչպես կա սկիզբ, կա նաև վերջ. ՀՀԿ մտան իշխանության, փողի, ազդեցության, տանիք ունենալու համար, և երբ արդեն ՀՀԿ-ն փլուզման եզրին է` փախչում են նավից:

Կուսակցությունն ամուր կլիներ գաղափարական հողի վրա. սա է աշխարհի կանոնը, սակայն փողի և իշխանության միացրածն անջատվում է, երբ կապակցող տարրերը ցրվում են: Այնպես էլ հիմա:

Դեռևս կշարունակի ՀՀԿ-ն լողալ ջրի երեսին, նրան պահողը միայն Սերժ Սարգսյանն է և նախագահի պաշտոնը: Նախագահի պաշտոնը չկա, Սերժ Սարգսյանը իշխանության գալու քիչ շանսեր ունի, իսկ ՀՀԿ-ն այլևս առաջվանը չէ:

Երկրի ղեկավարի պաշտոնից հրաժարվելով, Սերժ Սարգսյանը նախևառաջ իր կուսակիցներին «քցեց», քանի որ հենց նրա շուրջ էր պտտվում կուսկացությունը: Այսօր արդեն, ՀՀԿ-ն տեղ չունի պտտվելու:

Այդ իսկ պատճառով, որոշ ժամանակ ՀՀԿ-ականները դեռ կմնան նավում` մինչև վերջնական կործանումը: Դա կարող է տևել անգամ մի քանի տարի:
Դեռևս ՀՀԿ-ն Ազգային ժողովում մեծամասնություն է կազմում, կարող է մերժել կառավարության առաջարկները, քննարկման ներկայացնել այլ նախագծեր. Դեռևս որոշակի ուժ ունի, որն էլ կցանկանան պահպանել` մինչև կտեսնեն՝ ինչ է լինում:

Նույն ճակատագիրն է սպասվում բոլոր այն կուսակցություններին, որոնք չունեն գաղափարախոսություն, նպատակ, այլ միայն ճանաչում են փողի և իշխանության եզրույթները և միավորվում են միայն իշխանության մեջ լինելու համար:

Իսկ Հայաստանում կա՞ն կուսակցություններ, որոնք գաղափարապես են միացված` ո՛չ, չկան: Կգա նաև մյուս կուսակցությունների ժամանակը, սակայն դրա համար էլ ժամանակ է պետք, ինչպես ՀՀԿ-ին:

Բոլոր քաղաքական փոփոխությունների վերջնաժամանակը միշտ էլ գալիս է, ինչպես եկավ ՀՀՇ-ի ժամանակը, ինչպես եկավ ՀՀԿ-ի ժամանակ, կգա նաև ԵԼՔ-ի ժամանակը: Եվ այն ժամանակ, ինչպես ՀՀՇ-ից սողոսկեցին ՀՀԿ, այժմ էլ ՀՀԿ-ից են ներթափանցում Ելք, այնպես էլ ԵԼՔ-ից ցատկելու են իքս կուսակցություն, որն այդ ժամանակ ալիքի կատարին կլինի:

NEWSPRESS.am