Լիլիթ Մակունց, մինչև ե՞րբ պիտի շարունակվի Օպերայում տիրող խայտառակությունը (ֆոտոշարք)

NEWSPRESS.am-ը մի քանի անգամ անդրադարձել է Երևանի սրտում գտնվող Օպերայի և բալետի ազգային ակադեմիական թատրոնի բակում տիրող խայտառակ իրավիճակին (Կարդացեք այստեղ, այստեղ և այստեղ):

Մայիսի 12-ից ՀՀ մշակույթի նախարարն է Լիլիթ Մակունցը, ով արդեն 18 օր է՝ այդ պաշտոնում է, սակայն այս կարևոր խնդիրը շարունակում է մնալ անլուծելի։ Մշակույթի նախարարը հանդիպեց մշակութային էլիտայի հետ, քննարկվեցին հարցեր, սակայն այդ քննարկումից հստակ երևաց, որ մշակութային գործիչները հիմնականում առաջ էին քաշում սեփական առաջարկները, որոնք էլ առաջիկայում նախարարության կողմից համապատասխան ֆինանսավորում ստանալու դեպքում առաջին հերթին հագեցնելու էին սեփական ֆինանսական հաճույքները, այլ ոչ թե ազգային մշակութային խնդիրը։ Այդ ամենը շարունակվում է նաև օնլայն տիրույթում, որտեղ մշակութային գործիչներից ոմանք շարունակում են գովերգել նախարարին։ Իրականում շատ բան հարկավոր չէ արձանների պատվանդանների ու Օպերայի արտաքին պատերի վրայի գրառումները մաքրելու համար։

Վստահաբար պետք է նշել նաև, որ մինչ պաշտոնավարումը մշակույթի նախարարը միանշանակ այդ տարածքում եղել է ու քաջատեղյակ է, թե ինչ խայտառակ վիճակում են գտնվում արձանների պատվանդաններն ու ակադեմիական թատրոնի արտաքին պատերը։

Մշակույթի նախարարությունում գործում է «Մշակութային արժեքների պահպանության գործակալությունն» ու «Պատմության և մշակույթի հուշարձանների պահպանության գործակալությունը», ովքեր միանշանակ պիտի զբաղվեին այս հարցով։ Թերթելով կայքերը՝ կարելի է հանդիպել բազմաթիվ նյութերի, որում լրագրողներն անդրադառնում են այս կարևոր խնդրին, սակայն խնդիրը շարունակում է մնալ անլուծելի։ Միայն տարիներ առաջ են մաքրվել այդ գրառումները, սակայն հիմա նույն վիճակն է ու այնտեղով ամեն օր անցնողները կփաստեն, որ գրառումներն ամեն օր ավելանում են։ Դա առաջին հերթին հասարակության մի որոշ խավի դաստիարակության պակասից է գալիս, մյուս կողմից՝ մշակույթի նախարարությունում կա հատուկ գործակալություն, որը պիտի զբաղվի այս հարցով։ Այս հարցով պիտի զբաղվեն նաև իրավապահ մարմիններն ու Օպերայի տնօրինությունը։

Փաստացի Օպերայի տարածքում խայտառակություն էր թե՛ Հասմիկ Պողոսյանի և թե՛ Արմեն Ամիրյանի ժամանակ։ Մնում է սպասել ու տեսնել, թե առաջիկայում ինչ քայլեր կձեռնարկի նորանշանակ նախարարն այս խնդիրը լուծելու համար: Մանավանդ, որ տարածքում տեսախցիկներին հետևելը, ոստիկանության կողմից վերահսկողություն իրականացնելն ու գրառումները մաքրելն այդքան էլ բարդ գործ չէ։ Իսկ Օպերան իր բակով ու արձաններով հանդերձ Երևանի մշակութային սիրտն է, որը պիտի լինի մաքուր, խնամված, գեղեցիկ ու վերահսկվող։