«Մեր որդուն խոշտանգել են»․ մահացած զինվորի ծնողները պնդում են՝ որդուն սպանել են (տեսանյութ)

Այն ժամանակ, երբ կառավարության ներսում լրագրողներն ավարտեցին Պաշտպանության նախարար Դավիթ Տոնոյանի հետ հարցազրույցը, վերջինս դուրս եկավ ետնամուտքից։ Այնուհետև նրան հետևեց նաև վարչապետ Փաշինյանը։ Այդ ժամանակ կառավարության շենքի ընդհանուր մուտքի պատուհանները մի կին սկսեց ծեծել ու աղմկել՝ կանչելով Տոնոյանին ու Փաշինյանին։

NEWSPRESS.am-ի հարցին, թե ի՞նչ է պատահել՝ կինը պատմեց, որ որդուն՝  Լևոն Թորոսյանին, բանակում սպանել են։ 

Լևոնն ընդամենը 10 ամիս է գտնվել բանակում։ Այդ ընթացքում, ծնողների խոսքով, տղան զանգել է տուն և պատմել, որ զորամասում խնդիրներ կան, սակայն, որ ամեն ինչ որդու մահով կավարտվի, ծնողները չէին պատկերացնում։

Լևոնին մահացած են գտել Տավուշի մարզի «Մեհրաբներ» կոչվող զորամասի մարտական հենակետում, մայիսի 6-ին: Դեպքի առթիվ հարուցվել է քրեական գործ և այն որակվել որպես «ինքնասպանություն»։ Ծնողներն այս դատավճռի հետ համաձայն չեն։

«Ամուսինս ներկա է եղել դիահերձմանը․ որդուս ամորձիներն ամբողջապես վնասված են եղել։ Դատական բժիշկն ասել է, որ ծեծել են, բայց ասեց նաև, որ ստուգումներից հետո կարող է ասել՝ մինչև մա՞հն են վնասվել ամորձինները, թե՞ մահվանից հետո։ Սա ի՞նչ հիմարություն է»,- վրդովված ու արցունքով լի աչքերով ասում էր զոհված զինվորի մայրը։ Նա դողացող ձեռքերի մեջ պահել էր որդու նկարն ու վստահեցնում, որ որդուն խոշտանգել են ու սպանել։

«Իմ երեխեն միշտ ասել ա՝ Մեհրաբի զորամասում բոլորն ուռած-քնած են: Երեխուս հանել են պոստեր, մի շաբաթ հետո ասում են՝ ձեր երեխեն... լեզուս չի պտտվում՝ էդ բառն ասեմ․․․ էս էլ նոր դեպք ա եղել, դե՛ թող պարզեն ու մեղավորներին պատժեն, ո՞նց կարող են ասել, որ ինքնասպան է եղել, ձե՞ռ են առնում»,- հուզված ասում էր մայրը։

Մանրամասները՝ տեսանյութում․