Մանկապարտեզից՝ մարզպետ. Փաշինյանի՝ դատարկ կենսագրություններով նշանակումները

Այսօր հունիսի 1-ն է՝ Երեխաների պաշտպանության միջազգային օրը և հավանաբար այս տոնով ոգևորված՝ վարչապետ Նիկոլ Փաշինյանն այսօր կառավարության նոր՝ մանկապատանեկան տարիքի և պատրաստվածության աստիճանի մարզպետեր նշանակեց:

Մեկը մեկից անպատրաստ, հանրության մեջ ոչ այնքան հայտնի դեմքերի, ովքեր առաջիկա մեկ տարին առնվազն սովորելու են, թե ինչ կա-չկա մարզում, առհասարակ մարզը որտեղ է, ինչ խնդիրներ և առավելություններ ունի: Մի խոսքով՝ մանկապարտեզից մարզպետ հասած պաշտոնյաները դեռևս պետք է մասնագիտական ուսուցման դասեր սերտեն, որպեսզի կարողանան երկրի համար այդքան կարևոր տարածքային կառավարումն իրականացնեն:

Այսօր մեր մարզերը լրջագույն խնդիրների առաջ են կանգնած՝ սկսած քանդած ճանապարհներից, վերջացրած գործարանների և տեղերում բիզնեսի, աշխատատեղերի բացակայությունից: Մեռած ու խամրած մարզերում վարչապետը նույնքան մեռած ու խամրած դեմքերի է նշանակում, որպես պատասխանատուներ և ակնկալում արդյունավետ աշխատանք՝ մոռանալով, որ մարզերը նույնքան կարևոր են մեր երկրի բնականոն զարգացման համար, որքան կառավարական նեղ օղակներում:

Նշանակված մարզպետների մեջ, որքան էլ շատ են երեխաները, այնքան էլ շատ են սկանդալների մեջ եփված դեմքերը, օրինակ, Վայոց Ձորում մարզպետ նշանակվեց արդեն նախկին ՀՀԿ-ական Արագած Սաղաթելյանը, ով եղել է Վայքի քաղաքապետ և հասցրել է կոռուպցիոն սկանդալների մեջ հայտնվել:

Գեղարքունիքի մարզպետ Իշխան Սաղաթելյանը խորհրդարանական ընտրություններին պատգամավորության թեկնածու էր և խայտառակ պարտություն կրեց, Արարատի մարզի Նոր կյանքի գյուղապետն աճեց այնքան, որ մարզպետ նշանակվեց, տպավորություն է, թե Նոր կյանք համայնքը Սինգապուրն է դարձրել, որն էլ նոր նշանակման շարժառիթ է դարձել:

Մեկ այլ անհավանական նշանակում է Կատայքի մարզի ինքնահավան մարզպետ Ռոմանոս Պետրոսյանը, ով գնում է մարզ՝ բնակչության մտածելակերպը փոխելու և բնակիչներին քաղաքացի դարձնելու, յա՜, ո՞ւր էիր, որ չկայիր: Իսկ ահա Շիրակի մարզում մարզպետ նշանակված Կարեն Սարուխանյանի կենսագրությունն այնքան դատարկ է, որ տպավորություն է՝ այս մարդն իր կյանքում հասցրել է ծնվել ու նշանակվել մարզպետ ու, դե իհարկե, գործում է նաև ԽԾԲ-ն՝ Փաշինյանի վաղեմի ընկեր Իջևանի ավագանու անդամ Վահե Ղալումյանը նշանակվեց Տավուշի մարզպետ:

NEWSPRESS.am