«Էլ.ցանցի ու «Գրիգոր Լուսավորիչ» բ/կ-ի աշխատողները բանդա են»․ տեսուչները 4-ամյա երեխայի ներկայությամբ հորը գցել են գետնին ու ծեծել

«Հայաստանի Էլեկտրական ցանցեր» ընկերության «Գեղամա» մասնաճյուղի տեսուչները և պետը ծեծել են բնակչին։

NEWSPRESS.am-ի հետ զրույցում տուժած բնակիչը՝ Էդուարդ Հինյանը, պատմեց, թե ինչպես 2016 թվականի ապրիլի 25-ին պարզել են, որ էլ.ցանցի աշխատակիցները 30 000 դրամի չափով հոսանքի ցուցմունք են արձանագրել։ Քաղաքացի Հինյանը Ջրվեժի բնակիչ է։ Նա վստահեցնում է՝ այդքան էլէներգիա, այն էլ՝ ապրիլ ամսին, չեն ծախսել։

«Նույնիսկ ձմռան ամիսներին չենք այդքան վառել, ո՞նց կարող էր ապրիլին նման ցուցմունք լինել․․․ ասում եմ՝ փորձաքննություն անցկացրեք, տեսնենք՝ մենք այդքան ծախսե՞լ ենք, թե՞ չէ, բայց բան չարեցին ու պահանջում էին՝ գումարը տամ։ Ասի՝ չեմ տալու, ես այդքան չեմ ծախսել, դուք գրել եք, դուք տվեք»,- պատմում է մեր զրուցակիցը։

Նրա կինը վրդովված է՝ տեսուչներն ամուսնուն 4 տարեկան երեխայի աչքի առաջ ծեծել են։ Միջադեպի մասին Էդուարդ Հինյանն ինքն է պատմում․ զանգահարել են, կանչել, որդու հետ դուրս է եկել։

«Ասեցին՝ էդ տղուդ հետ ես եկել, որ բան չասե՞նք, ասեցի՝ տղուս մանկապարտեզից եմ հետս բերել, եթե այդ նպատակով եք եկել, կարող եմ երեխային տանել մոր մոտ, հետո խոսենք։ Մեքենայով էին եկել, մեկ էլ երկրորդ մեքենան եկավ, ու պետն իջավ, ասեց՝ էդ դո՞ւ ես, որ ասել ես՝ չես մուծելու փողը, ասեցի՝ ես ինչի՞ պետք ա մուծեմ, դե դուք թիվ եք գրել, դուք էլ մուծեք։ Էդտեղ հարձակվեցին վրաս»,- պատմում է մեր զրուցակիցը։

Քաղաքացին ընկել է, սակայն տեսուչները չեն «նահանջել». հենց երեխայի ներկայությամբ շարունակել են խփել ընկած տղամարդուն։ Երեխան վախից ճչացել է։

Հետո շտապօգնություն է եկել ու տարել Էդուարդին «Գրիգոր Լուսավորիչ» բժշկական կենտրոն։ Այստեղ տուժածին, նրա խոսքով, տվել են կեղծ ախտորոշում՝ կոտրվածքը որակելով սալջարդ։ Էդուարդ Հինյանը չի բացառում՝ սա պայմանավորվածություն է եղել տեսուչների և հիվանդանոցի աշխատողների միջև։

Արդեն ավելի ուշ, երբ նրա ինքնազգացողությունը կրկին վատացել է, Հինյանը դիմել է մեկ այլ բուժհաստատություն՝ «Վարդանանց» կենտրոն, որտեղ համակարգչային տոմոգրաֆիայի արդյունքում պարզվել է, որ ուղեղի ցնցում է ստացել և գանգի ճաք։ Սրանից հետո նա բավականին երկար ժամանակ բուժում է ստացել ու մինչ օրս էլ բուժվում է։

«Դատարանն էդ մարդկանց դիտավորությամբ կյանքին վտանգ սպառնացող, ծանր վնասվածք պատճառելու հոդվածով մեղադրանք առաջադրեց, ինձ էլ՝ ծեծի մեղադրանք առաջադրեց»,- ասաց քաղաքացին՝ հավելելով, որ իրեն վնաս հասցնող տեսուչները՝ Գևորգն ու Վահանը և Սամվել Մուրադյանը, չնայած առաջադրված մեղադրանքին, պատիժ չեն կրել և շարունակում են աշխատել։

Մինչ օրս գործով դատավարություն է ընթանում։ Էդուարդն ասում է, որ իրեն առաջարկել են գնալ և փոխել ցուցմունքը, սակայն ինքը չի գնացել այդ քայլին՝ երկու պատճառով․ նախ սկզբունքային է և ուզում է՝ մեղավորներն արժանի պատիժ կրեն, իսկ երկրորդ՝ եթե նա այլ ցուցմունք տա՝ կմեղադրվի սուտ մատնության մեջ։ Ասում է, որ իրեն գումար էլ են առաջարկել (ունի ձայնագրություններ)։

Այժմ Էդուարդ Հինյանը չի ներկայանում դատական նիստերին՝ դատավորի կամայականությունների պատճառով։

«Ակնհայտ երևում ա, որ իրենց օգտին են տանում, հենց իրենց ցուցմունքներում իրար հակասող շատ բաներ կան։ Ես դատական նիստերին չեմ գնա այնքան ժամանակ մինչև  ամբողջ հանցակազմը չներկայանա․ այսինքն՝ «Գրիգոր Լուսավորչի» բոլոր բժիշկները, ովքեր կեղծ ախտորոշումներ են տվել, տեսուչներն ու ոստիկանները»,- ասում է քաղաքացին ու հավելում․ «Էլ.ցանցի ու «Գրիգոր Լուսավորիչ» բ/կ-ի աշխատողները բանդա են»։

Էդուարդ Հինյանն այս 2 տարվա ընթացքում 3 փաստաբան է փոխել ու հիմա դարձյալ փաստաբանի կարիք ունի։

Հակառակ կողմի հետ առայժմ մեզ կապ հաստատել չհաջողվեց, սակայն պատրաստ ենք լսել նաև նրանց պարզաբանումները գործի շուրջ՝ կեղծ ախտորոշումների, երեխայի ներկայությամբ հոր ծեծի և հոսանքի՝ ավելացված գումարների մասին։