Կեցցե՛ն սկանդալային Տաթևիկն ու իր խայտառակ որոշումը

Ապրիլի 22-ին Էրեբունի վարչական շրջանում տեղի ունեցած զանգվածային անկարգությունների փաստով ձերբակալված Մասիսի քաղաքապետ Դավիթ Համբարձումյանին այսօր դատարանն ազատ արձակեց:

Խաղաղ ցուցարարների ծեծը կազմակերպած Մասիսի քաղաքապետի ձերբակալությունը հայտնի սկանդալային դատավոր Տաթևիկ Գրիգորյանը ճանաչեց ապօրինի:

Համբարձումյանին կալանավորելու համար հիմք այդպես էլ դատավոր Գրիգորյանը չգտավ: Հիշեցնենք, որ Տաթևիկը հանրությանն առավել հայտնի դարձավ Ժիրայր Սեֆիլյանի դատավարության ժամանակ, երբ դատավարության ողջ ընթացքում այդպես էլ չկարողացավ վերահսկել դատական պրոցեսը, իսկ շատ անգամներ էլ, Սեֆիլյանի կողմնակիցների ճիշմանը չդիմանալով, ընդհատում էր դատական նիստերը, փաստաբաններին էլ անընդհատ պատժելու սանկցիաների միջնորդություններ ներկայացնում:

Եվ հիմա նույն դատավորը, ով Սեֆիլյանի գործով կառչում էր ամեն մի մազից, զանգվածային անկարգությունների փաստով կալանավորված քաղաքապետին որոշեց ազատ արձակել՝ հավանաբար, վախենալով Մասիսի քաղաքապետին ազատ տեսնելու պահանջով բողոքի ակցիա անող մասիսցիների հնարավոր գործողություններից, կամ էլ փորձեց իր այս որոշմամբ անցավ գլուխը գլխացավանքի տակ չդնել և պարզապես լռեցնել բողոքի ձայնը:

Բայց արդյո՞ք դատավորի այս որոշումը չի կարող նախադեպ դառնալ, որ քաղաքապետերն էլի ծեծեր կազմակերպեն կամ ծեծեն՝ իմանալով, որ անպատիժ են մնալու, որովհետև կան տաթևիկգրիգորյաններ: Արդյո՞ք սա է մեր նոր ու վերափոխված Հայաստանը, որտեղ սկսել են բոլոր հարցերը լուծել բողոքի ակցիաներով, ցույցերով ու սպառալիքներով, որոնցից մի տեսակ անկառավարելիության հոտ է գալիս:

Հետաքրքիր է՝ Տաթևիկ Գրիգորյանը նույնքան արագ կհանձնվի, երբ մեկնարկեն արդարադատության համակարգից իրեն հեռացնելու պահանջով բողոքի ակցիաներ, արդյոք նույն հապճեպությամբ բողոքի ձայնը կլռեցնի ու կդադարի գործել որպես դատավոր՝ իր տեղը զիջելով արդարադատության իրական դեսպաններին, որոնց պարագայում արդարացված կլինի Դավիթ Համբարձումյանի՝ «Կեցցե՛ Հայաստանի Հանրապետությունը և արդարադատությունը» կոչը:

NEWSPRESS.am