Մալդինին, Պույոլը, Կական Կառլոսը, Տոտտին․․․․Հայաստանո՞ւմ․ Աշխարհի առաջնությունը մեկ օրով կտեղափոխվի Երևան

Ամիսներ առաջ հայաստանյան սպորտային կայքերը գրեցին այն մասին, որ ամռանը ֆուտբոլային աշխարհի լեգենդների հանդիպում է տեղի ունենալու, որին մասնակցելու են բոլորին հայտնի ֆուտբոլային աստղեր։ Արդեն այսօր հայաստանյան սպորտային կայքերը սկսեցին նշել մանրամասներ այդ հանդիպումից։

Ինչպես տեղեկանում ենք armsport.am-ից, այսօր մամուլի ասուլիսի ընթացքում «Փյունիկ» ֆուտբոլային ակումբի սեփականատեր Արթուր Սողոմոնյանը ներկայացրել է մանրամասներ ու նշել, թե հատկապես ո՞ր ֆուտբոլիստներն են ժամանելու Երևան։

Արթուր Սողոմոնյանն իր խոսքում մասնավորապես նշել է․

«Այդ խաղին մասնակցելու համար Հայաստան կժամանեն Իվան Սամորանոն, Խրիստո Ստոիչկովը, Յարի Լիտմանենը, Կաֆուն, Ռիվալդոն, Պաուլո Մալդինին,Դիմիտրիո Ալբերտինին և մի շարք այլ հայտնի անուններ։ Սպասում ենք նաև Պույոլի, Մաթեուսի, Տոտտիի պատասխանին, ովքեր այդ խաղին մասնակցելու մեծ ցանկություն են հայտնել: Բանակցություններ ենք վարում նաև Ռոբերտո Կառլոսի և Կակայի հետ: Կարծում եմ` Խորեն Հովհաննիսյանը ևս կկարողանա մասնակցել լեգենդների խաղին»։

Հանդիպումը կկայանա հուլիսի 8-ին։ Հավելենք նաև, որ նմանատիպ հանդիպում տեղի ունեցավ նաև 2015 թվականի մարտի 28-ին՝ Երևանի Վազգեն Սարգսյանի անվան մարզադաշտում։ Սիրված հայ ֆուտբոլիստ ու ֆուտբոլի լեգենդ Խորեն Հովհաննիսյանի ծննդյան 60-ամյակին նվիրված ընկերական հոբելյանական հանդիպմանը ներկա էին Ջենարո Գատուզոն, Մարկո Մատերացին, Իվան Սամորանոն և այլ աստղեր։