«Այստեղ մարդիկ են գալիս ու դիմում գրում, որ ամուսինն իրեն դավաճանել է»․ Արցախում մարդիկ այլ կարծիքներ ունեն

Ինչպես արդեն հաղորդել ենք, Արցախում իրավիճակը մի փոքր հանդարտվել է։ Քիչ ցուցարարներ են մնացել, ովքեր հավաքվում են Արցախի մայրաքաղաք Ստեփանակերտում գտնվող Երիտասարդության ու մշակույթի պալատում, մտքեր փոխանակում, քննարկում, իսկ ամբողջ օրվա ընթացքում այնտեղ քաղաքացիներ են գալիս ու դիմումներ գրում։

NEWSPRESS.am-ի հետ զրույցում Ստեփանակերտի բնակիչը, ով «կողքից հետևում է» ցույցերին, նշեց, որ իրականում շատերը նույնիսկ չեն էլ հասկանում, թե ինչի՞ համար են գալիս ցույցի։ Նա հարգելի պատճառներով չցանկացավ ներկայանալ։

«Արդեն մի քանի օր է, որ իրավիճակը լարված է, սակայն ամեն ինչ խառն է։ Նույնիսկ էստեղ շատերը չեն հասկանում, թե ի՞նչ կապ ուներ այդ հայտնի կռիվը ուժային կառույցների ղեկավարների հրաժարականների հետ։ Եթե կար խնդիր, ապա ինչո՞ւ մինչ այդ չէին դուրս գալիս փողոց։ Կամ այդ կռիվն ի՞նչ կապ ունի ցուցարարների առաջ քաշած պահանջների հետ։ Ես ամեն օր էստեղ եմ լինում, սակայն ինքս է լ չեմ հասկանում, թե այստեղ հավաքված մարդիկ ի՞նչ են ցանկանում, ինչի՞ համար են գալիս ու ի՞նչ են ակնկալում ապագայում»։

Քաղաքացին նշեց, որ դիմումներ գրելու սեղանների մոտ ասեղ գցելու տեղ չկա, իսկ ոմանք էլ դիմում են գրում հենց ուղիղ Նիկոլ Փաշինյանին։

«Շատերը դիմում են գրում Նիկոլ Փաշինյանին։ Ոմանք գալիս են ու գրում են իրենց վարկային պատմության, պարտքերի, բանկին տոկոսների մասին։ Դրանք այն խնդիրներն են, որ արդեն 10 ու ավելի տարի կան։ Նույնիսկ մարդ կար, որ նամակ էր գրում, թե իբր ամուսինն իրեն դավաճանել է (ծիծաղում է)։ Անկեղծ կասեմ, որ շատերը չեն հասկանում, թե ինչի համար են գալիս, սակայն գալիս են»։

Հավելենք նաև, որ Արցախի մայրաքաղաք Ստեփանակերտում բոլորն են խոսում հանարահավաքների ու բողոքի ակցիաների մասին, սակայն ոչ բոլորն են համամիտ ցուցարարների հետ ու ոչ բոլորն են կիսում նրանց կարծիքները։