Կարեն Ավագյանի վերջի սկիզբը

Վերջին իրողությունների ֆոնին իր արժանավոր տեղն ունի Հայաստանի երիտասարդական հիմնադրամի ոչ այնքան երիտասարդ ղեկավար Կարեն Ավագյանը. նա բոլորին զարմացրեց, երբ 326 մլն դրամի գողության մասին հայտնեց ՀՀ քննչական կոմիտեին:

Ըստ Կարեն Ավագյանի հաղորդագրության՝ ՀԵՀ երկար տարիների գործադիր տնօրեն Ալեքսանդր Տեր-Հովակիմյանը փոխառության պայմանագիր է կնքել ինքն իրեն հետ: Թե ինչպես է պարզել Կարեն Ավագյանը, հայտնի չէ, միայն այն է հայտնի, որ նա ինչ-որ հանելուկային ձևով հայտնաբերել է հանցագործությունը հաղորդում տալուց մեկ ամիս առաջ: Երևի երկար մտատանջվել է և միայն մեկ ամիս անց դիմել է իրավապահ մարմիններին:

Այսօր Կարեն Ավագյանը լրագրողներին փոխանցել է, որ ցավալի փաստ է տեղի ունեցել և իրականում հենց իր ահազանգի հիման վրա են որոշ բացահայտումներ կատարվել:
Նաև առաջարկել է, որ գործը թողնեն իրավապահներին. նրանք պետք է գնահատական տան: «Մի տրվեք քաղաքական սադրանքներին». խորհուրդ է տվել ամենեցուն:

Թե ինչո՞ւ է իր վաղեմի ընկերոջը, մեղմ ասած, «փռայրում» արել, չի պատասխանել:

Ի դեպ, ՀԵՀ-ը տարիներ շարունակ հսկայական գումարներ է ստացել տարբեր ծրագրերով. վերջերս բացահայտվեց, որ անգամ բուհերն են վճարումներ արել ՀԵՀ-ին. բուն իմաստը պարզ չէ: Իսկ ոչ այնքան վաղուց հայտնի դարձավ, որ նրա ազգականը, ավելի կոնկրետ՝ քեռու տղան, ՀԵՀ-ի սոցիալ-տնտեսական և զբաղվածության ծրագրերի համակարգող Խաչիկ Զաքարյանը, 80 հազար դոլար էր նվիրել Կարեն Ավագյանին: Կոռուպցիան ավելի քան ակնհայտ էր, սակայն այն ժամանակ ՀՀԿ-ն թամբին էր. այդ  մասին խոսվեց ու անցավ. միայն խոսվեց:

Եվ այժմ նա 326 մլն դրամի մասին է խոսում, որն, իհարկե, առանց Ավագյանի գիտության որևէ տեղ չէր էլ գնա, իսկ Քննչական կոմիտե դիմել պարզապես մահամերձի վերջին ճիգն է` կյանք վերադառնալու համար:

Դիտարկմանը, որ հաղորդում ներկայացնելով՝ կոնկրետ մարդկանց «պոդստավկա» է արել և «գործ տվել», պատգամավորը չհամաձայնեց հնչած տեսակետի հետ. «Ես ինքս եմ ահազանգը հնչեցրել» և դրանով որոշեց, որ հարցը փակված է:

Հիշեցնենք, որ ՀԵՀ-ի չարաշահումների մասին էլ միշտ խոսվել է, սակայն միշտ Ալեքսանդր Տեր-Հովակիմյանն է պատասխանել բոլոր հարցերին և արդարացրել ՀԵՀ-ի ծախսերը:

Իհարկե, դեռ այնքան էլ պարզ չէ, թե ինչ է տեղի ունեցել և ունենում, սակայն այն, որ Ավագյանը խառն է այդ փոխառության մեջ, դժվար կասկած ունեցող գտնվի, իսկ ընկերոջը պարզապես հնոցում այրում է միայնակ` համատեղ չայրվելու փոխարեն...

NEWSPRESS.am