ԱԺ լրատվության և հանրության հետ կապերի վարչությունը նոր պետ ունի, իսկ Արսեն Բաբայանը՝ նոր պարտավորություններ

Ազգային ժողովի լրատվության և հանրության հետ կապերի վարչության պետ Արսեն Բաբայանին կփոխարինի Կնյազ Սարոյանը։ Այդ մասին ֆեյսբուքյան իր էջում գրել է Արսեն Բաբայանը։

«Լրատվամիջոցների հարգելի ներկայացուցիչներ,

սիրով տեղեկացնում եմ, որ ՀՀ ԱԺ աշխատակազմը համալրվեց ևս մեկ պրոֆեսիոնալով։ ԱԺ աշխատակազմի լրատվության և հանրության հետ կապերի վարչության ղեկավարումը վստահորեն հանձնում եմ նոր ղեկավարին։

Ձեզ եմ ներկայացնում ոլորտի գիտակներից մեկին՝ Կնյազ Սարոյանին, ում այսուհետ կարող եք դիմել հարցերով ու վարչության մյուս գործառույթների իրականացման առաջադրանքներով։ Կնյազին թեև կարճ ժամանակ է, որ ճանաչում եմ, բայց վստահություն ունեմ, որ արդյունավետ է աշխատելու»,-գրել է Արսեն Բաբայանը։

Նա նաև նշել է, որ լրագրողները կարող են նաև իրեն դիմել հարցերով, թեև մյուս կողմից էլ հիշատակել է, որ իր ծանրաբեռնվածությունն բազմապատկվել է։ Այս մասին նա գրել է․

«Հարգելի գործընկերներ և լրագրողներ,

իհարկե ինձ էլ կարող եք դիմել հարցերով, որպես աշխատակազմի ղեկավարի տեղակալի, բայց խնդրում եմ հիմնականում ծանրաբեռնել պարոն Սարոյանին, քանի որ իմ աշխատանքային ծանրաբեռնվածությունն ապրիլի 9-ից բազմապատկվել է հինգ անգամ։

Բացի լրատվության և հանրության հետ կապերի վարչությունից՝ միաժամանակ համակարգում եմ ԱԺ աշխատակազմի անձնակազմի կառավարման, իրավական սպասարկման, քաղաքացիների ընդունելության և նամակների ստորաբաժանումները, ինչպես նաև ընդհանուր բաժինը»։