Մարուքյանը հաշվում է նիկոլականների տարիքը

Այսօր Ազգային ժողովում Ելք խմբակցության պատգամավոր Էդմոն Մարուքյանը անդրադարձ է կատարել հեղափոխականներին և նրանց միտումներին, մասնավորապես, ասել է, որ «հեղափոխությունից առաջ մարդիկ որևէ բանով աչքի չէին ընկել, մեկ էլ հեղափոխություն է եղել, ասում են՝ վայ, չեք հիշո՞ւմ, էն ժամանակ ես ինչպես էի պայքարում այս ռեժիմի դեմ։ Ժողողովուրդ ջան բոլորի արածն ու ասածը բոլորի աչքի դեմ է, ով ուր է եղել, ով որտեղ, ով ինչ է արել: Այս թրենդն ուղղակի աբսուրդի է մղում, որովհետև ամեն տեղից վեր կացող դարձել է հեղափոխական: Իշխանություններին մի թթու խոսք ասել վախեցողներն այսօր քննադատում են»։

Ի դեպ, եթե Մարուքյանը չի մոռացել, դեռևս ապրիլ ամսին նա չմիացավ իր դաշնակից Նիկոլ Փաշինյանի կազմակերպած քայլարշավին, ունենալով նրա հետ գաղափարական տարաձայնություններ։ Եվ չի բացառվում, որ այդ է պատճառը, որ Մարուքյանը դեռեւս որևէ պաշտոն չի ստանձնել, քանի որ լինելով միևնույն կառքում՝ Նիկոլն ու Էդմոնը գնում էին տարբեր ուղղություններով։

Եվ միայն՝ երբ ընդվզումը հասունացավ և արդեն նախանշվում էր մոտալուտ կտրուկ փոփոխությունները քաղաքական դաշտում, Մարուքյանը հասավ Հանրապետության հրապարակ։

Ի դեպ, դրանից մի քանի օր առաջ Մարուքյանը հայտարարել էր, որ չի փոշմանել, որ չի միացել Փաշինյանին։ Եվ նույն Մարուքյանը, ով կողմ էր իշխանությունների փուլային փոփոխություններին, այսօր կարծես մոլի հեղափոխական է դարձել: Իհարկե, ճիշտ է նկատել, որ տեղից վեր կացողն այսօր եհղափոխականի տիտղոսն է կրում, սակայն չէ՞ որ ինքն էլ դեռ երեկ՝ մերժում էր միանալ Նիկոլին, այսօր էլ մերժում է հանկարծահաս հեղափոխականներին։

Չմոռանանք, որ Մարուքյանը համոզված էր, որ նախ՝ ժողովուրդը դուրս չի գա փողոց, և հետո՝ պետք է Սերժ Սարգսյանի դեմ պայքարել խորհրդարանում՝ իշխանությունից վերահսկողական նոր լծակներ պահանջել և այլն։

Արդեն նոր իրողությունների պարագայում միայն, տեսնելով, որ ինչքան էլ Նիկոլի մոտ մեղա գա նախկին ոչ հեղափոխական քայլերի համար, իրեն ներում չի լինելու, որոշեց խորհրդարանում Նիկոլի թիկունքը պահել՝ իհարկե, ոչ թե նրա համար, որ այդքան ցավում է Փաշինյանի համար, այլ նրա, որ այլ տեղ չուներ գնալու և ակնկալիք էլ չկար։

Եվ այժմ, սահմանափակված լինելով խորհրդարանով, «նորելուկ» հեղափոխականներին դասեր է տալիս և որոշում, թե ով, երբ, ինչպես է հեղափոխական դարձել. սեփական հեղափոխական ձախողումների վերաբերյալ՝ ոչ մի բառ։

Ուղղակի Մարուքյանի համար ցավալի է, որ երեկվա ոչ նիկոլականները դարձել են երդվյալ նիկոլականներ, իսկ ինքը, որ ամենամեծ նիկոլականը դառնալու հնարավորություն ուներ՝ սեփական կամքով պահում է Նիկոլի թիկունքը։

NEWSPRESS.am