Մանվելն ուրացավ իրեն պահած-շահած Սերժ Սարգսյանին ու դեռ աղջիկ-տղայի խառնվելուց է խոսում

Երեկ՝ հունիսի 12-ին, ԱԺ-ում լրագրողների հարցին պատասխանելով, պատգամավոր Մանվել Գրիգորյանը պահանջեց իրեն չնույնացնել Արթուր Ասատրյանի՝ Դոն Պիպոյի հետ, քանի որ իր ընտանիքը բազում գործեր ունի արած։

«Եթե ինձ ու Ասատրյանին մի հարթության վրա են դնում, ուրեմն աղջիկ-տղեն խառնվել ա իրար»,- հայտարարեց Գրիգորյանը։

Հարցին, թե ինչո՞վ են տարբերվում նրանք՝ նա պատասխանեց․ «Գրիգորյանները հայ ազգին են թուրքից ազատագրել․․․»։

Չենք փորձում խոսել Արթուր Ասատրյանի այն բարեգործությունների մասին, որոնց մասին չի բարձրաձայնվում և ամպագոռգոռ հայտարարություններ չեն արվում, պարզապես փորձենք հասկանալ, թե ինչ են արել և ինչպես են թուրքից ազատել Գրիգորյանները հայ ժողովրդին։

Արցախյան պատերազմի թոհուբոհով անցած ու զենքը ձեռքը վերցրած Մանվել Գրիգորյանը շատ արագ մոռացավ, թե ինչու է այդ զենքն իր ձեռքին և ինչի համար է կանգնել սահմանին։

Նրա մասին շատերն են պատմում, թե ինչպիսի «մարտական ուղի է» անցել․ այդ ուղին անցել է ոչ միայն թշնամու, այլև հայի արյան վրայով։

Մարդիկ չեն բարձրաձայնում, բայց շշուկով օդի մեջ տարածվում է, թե ինչպես է գեներալը մեքենաներով իր տուն տարել գյուղերի ավարը։  Ա՛յ սա է «գեներալի» կոչման իրական պատմությունը, այսպես է նա հռչակել իրեն «գեներալ» ու նաև իրեն վերագրել Վազգեն Սարգսյանի հիմնած Երկրապահների միության ստեղծումը։

Մինչ ձևավորվում էին երկրապահ կամավորների ջոկատները, Գրիգորյան Մանվելն իր տուն էր տեղափոխում թալանը։ Հետո նստեց երկապահի գահին ու սկսեց թալանել սեփական ժողովրդին․ ձեռքը սովորել էր թալանին և ոչ միայն դրան։ Պատմում են, որ նա սովորել էր նաև անխնա խեղել ու նեղացնել բոլորին, ով իրեն դուր չէր գալիս՝ ծեր ու ջահել չէր հարցնում, կին-տղամարդ չէր հարցնում․․․

Այսօր Էջմիածնում հազիվ գտնվեն մարդիկ, ովքեր եթե ոչ բարձրաձայն, ապա գոնե ծածուկ չբողոքեն Գրիգորյաններից, իսկ Գրիգորյանը հպարտանում է, թե ինքն ազգին թուրքից է ազատել․ թուրքից ազատել, իր սրի տակ է գցել։

Հայրենասե՞ր, ազգի պաշտպա՞ն․․․․ այս որակումները Գրիգորյանի համար չեն։ Նա իր ընտանիքից ու իրենից այնկողմ ոչինչ չի սիրում, նա նույնիսկ սահման է գծել իր ու էջմիածինցու միջև՝ արգելաձողերով։ Նա մինչև անգամ իր որդիների ու ծոռների բարեկեցիկ ծերությունն է ապահովել. Գրիգորյանների շքեղ առանձնատներն ու մեքենաները վկա, էլ չենք խոսում մյուս կապիտալի մասին։

Աստված տվել, չի խնայել նաև նրա՝ ձեռնասուն կենդանու նման առաջ վազող ու իր համար դոշ տվող ենթականերին, ովքեր պատրաստ են անգամ իրենց ձեռքերը կեղտոտել անմեղ մարդկանց արյունով՝ Գրիգորյանի հրահանգով։

Մի քանի նախագահի ձեռքի տակով անցած և նրանց տաշտակից սնված գեներալն այն աստիճան սրբություն չունի, որ ուրացավ իրեն սնող ձեռքը ու նախագահ Սերժ Սարգսյանի հրաժարականից հետո անմիջապես ինքն էլ ՀՀԿ-ից հրաժարվեց․  «Ո՞վ է հանրապետական, ե՞ս․․․ չէ՛, ես հանրապետական չեմ․․․»,- վախեցած ասաց նա։

«Գեներալը» գուցե չվախենար, եթե իր ապրած կյանքով կարողանար բացճակատ կանգնել ժողովրդի դիմաց, բայց նա այսօր արդեն վախենում է էջմիածինցու ցասումից, որոնց, հավանաբար, բոլորին էլ վնասել է։

NEWSPRESS.am