Կոկորդ կրծելով ջուր է պղտորում, որ ձուկ որսա

Գնալով ավելի անկառավարելի իրավիճակ է ստեղծվում Նիկոլ Փաշինյանի ստեղծած ԵԼՔ դաշինքում։ 

Երեկ արդեն Փաշինյանի ստեղծած թիմի պառակտման մասին գուժեց Մանե Թանդիլյանն՝ իր հրաժարականով ապացուցելով, որ համամիտ չէ վարչապետի հետ և չի ենթարկվում նրա պահանջներին։

Նիկոլ Փաշինյանի թիմակցիների միջև ծագած գզվռտոցի մասին է վկայում նաև պատգամավոր Էդմոն Մարուքյանն, ով այսօր լրագրողների հետ զրույցում շտապեց ցիտել ԱԺ կանոնակարգ օրենքը և հիշեցրեց, որ այս պահին ԵԼՔ-ն Ազգային ժողովում ընդդիմություն է՝  ի հեճուկս ԵԼՔ-ականների պնդումների, թե իրենք այլևս իշխանություն են։

Եթե ԵԼՔ-ում ծավալված խժդժությունները չլինեին, Էդմոն Մարուքյանը, վստահաբար, կեղտոտ սպիտակեղենը դուրս չէր հանի և չէր ցիտի ԱԺ կանոնակարգը, սակայն, քանի որ այս պահին փորձում է պղտորել ջուրը և ձուկ բռնել, որոշեց այդ մասին բարձրաձայնել։

Էդմոն Մարուքյանը սկսել է ԵԼՔ-ի կազմալուծման գործընթացը, նախ՝ Մանե Թանդիլյանի խելքն ուտելով ու գլխի գցելով, որ պետք է սկզբունքներից չհրաժարվել և հրաժարական տալ, ապա՝ ծավալելով պատերազմ Լենա Նազարյանի հետ․ նրանք այժմ իրար կոկորդ են կրծում խմբակցության ղեկավարի պոստում հայտնվելու համար ու այս անմիաբանությունից վատ հոտ է գալիս։

Ու մինչ ԵԼՔ-ից սկսկել է վատ հոտ գալ, Նիկոլ Փաշինյանը շարունակում է լայվերը, որոնց ընթացքում, ի դեպ, սկսել է շրջանցել իրեն դուր չեկող հարցերը՝ հրաժարվելով հեռախոսազանգերին պատասխանելու կուլտուրայից, ինչի մասին այսօր գրել էր նախկին վարչապետ Հրանտ Բագրատյանը․ «Չէի գրի։ Կգայի կպատմեի։ Բայց զանգերիս չես պատասխանում, հետ չես զանգահարում։ Ի դեպ սա առաջին դեպքն է։ Նախկինները, որոնց հստակ ընդդիմադիր էի, նույնիսկ նախագահը, եթե տեղում էլ չէին, մի քիչ հետո հետ էին զանգում։ Գիտեին, որ ես երբեք անձնական հարցով չեմ զանգահարում»։

Սպասենք, գուցե Փաշինյանը Մոսկվայից վերադառնալուց հետո վերանայի՞ իր վարքը, թե չէ՝ շատ շուտ ականատես կլինենք անդառնալիին․․․

NEWSPRESS.am