Ահա թե ինչ ի նկատի ուներ Բաբայանը՝ «թողեք Արցախը մինչև 20 թիվն ապրի, եթե կապրի» ասելով․․․

6 տարի ազատազրկման դատապարտված և 1 տարի 6 ամիս անազատության մեջ անցկացրած՝ Արցախի հերոս Սամվել Բաբայանն այսօր ազատ արձակվեց։

Այն, որ Բաբայանն ազատ արձակվեց, սպասելի էր՝ հաշվի առնելով թավշյա հեղափոխությունն ու քաղաքական տարբեր հայացքների, մանր-մունր անկարգությունների, «կարված գործերի» համար բանտեր լցված քաղաքացիների նկատմամբ դատարանների թավշյա վերաբերմունքը։ Բայց այն, ինչ ասաց Սամվել Բաբայանն ազատության մեջ հայտնվելուց հետո, լրագրողների հետ զրույցում, անսպասելի էր։

Լրագրողի հարցին՝ արդյոք ազատ արձակվելուց հետո պատրաստվում է մեկնել Արցախ, Սամվել Բաբայանը պատասխանեց, որ իր Արցախ մեկնելը կախված է Հայաստանի իշխանությունների որոշումից և հավելեց․ «Եթե գտնեն, որ ես այնտեղ պետք է լինեմ, ես կլիեմ»։

Սամվել Բաբայանին տրված հաջորդ հարցը վերաբերում էր Արցախում տեղի ունեցող զարգացումներին, և հենց այստեղ էր, որ Բաբայանն անսպասելի պատասխան տվեց․ «Ղարաբաղը շատ վտանգավոր կետի է և չի կարելի այնտեղ խաղալ։ Թողեք մինչև 20 թիվը խաղաղ ապրի Ղարաբաղը, եթե կապրի»։

Թե ինչ ի նկատի ուներ Սամվել Բաբայանը, «եթե կապրի» ասելով, այս պահին դժվար է պնդել 100 տոկոսով, բայց այն, որ այդ արտահայտության տակ շատ բան է թաքնված և դա հենց այնպես ասված խոսք չէր, հաստատ է։

Բոլորին է հայտնի, որ այսօր Արցախը գտնվում է պատերազմի շեմին և Արցախա-ադրբեջանական սահմանի ողջ երկայնքով հակառակորդի զորքի և զինտեխնիկայի կուտակումը հենց այնպես չէ։ Հակառակորդը, եթե չունենար հստակ թիրախ և հեռահար նպատակ, սահմանի վրա այդքան ծախս չէր անի՝ իր զորքին այնտեղ պահելով։ Ու թեև ՀՀ պաշտպանության նախարար Դավիթ Տոնոյանը մշտապես խորհուրդ է տալիս հանգիստ լինել՝ վստահեցնելով, որ ամեն ինչ վերահսկվում է հայկական կողմից, նույն լավատեսությունը Սամվել Բաբայանը չունի. հավանաբար, նույն պոզիտիվը չունի նաև մեր նորօրյա իշխանությունը, դրա համար էլ որոշեց ազատ արձակել մի մարդու, ով ուղն ու ծուծով գեներալ է, փորձված հրամանատար, ում փորձն Արցախում ծագած հնարավոր պատերազմի դեպքում չօգտագործելն աններելի կլինի։ 

Հենց այս միտքն էր ակնարկում Սամվել Բաբայանը, երբ ասաց, որ եթե որոշեն, որ էնտեղ պետք է լինի, կլինի, ու նա դա կանի՝ անկախ Բակո Սահակյանի ցանկությունից։ Նա Արցախում կլինի՝ անկախ իր դեմ այնտեղ առկա դժգոհություններից, որովհետև վստահ է՝ հայաստանյան իշխանությունների միջոցով մի քանի օրում թավշյա հեղափոխությունը կսրբի ու կտանի Արցախում իր համար անցանկալի իշխանությանն՝ այնտեղ ևս տեղ բացելով նորերի համար։ 

Իսկ այդժամ կգա Բաբայանի հերոսացման ժամանակը՝ թե՛ որպես քաղաքական հալածանքների ենթարկված մարդ՝ քաղբանտարկյալ, թե՛ որպես նորից թշնամու դեմ պայքար մղող հրամանատար, ինչն էլ չի բացառի Արցախի նախագահի պաշտոնում նրա ընտրությունը։

NEWSPRESS.am