ՊՆ համար նախատեսված իրերն ու սնունդը ԵԿՄ-ին է փոխանցվել օրինական կարգով․ Արծրուն Հովհաննիսյան

Պաշտպանության նախարարի մամուլի խոսնակ Արծրուն Հովհաննիսյանը վստահեցնում է․ միայն Պաշտպանության նախարարության համար նախատեսված իրերն ու սնունդը, որոնք հայտնաբերվել են Մանվել Գրիգորյանի պահեստում, օրինական կարգով ՊՆ-ն փոխանցել է ԵԿՄ-ին։

Արծրուն Հովհաննիսյանը լրագրողների հետ զրույցում նշում է երկու եղանակ, որոնց միջոցով ՊՆ սնունդը փոխանցվել է ԵԿՄ-ին։ Դրանցից մեկն այն է, որ արդեն 20 տարի է՝ ամենօրյա բանակումներ է անցկացնում ԶՈւ-ում, որի ժամանակ ստանում են ՊՆ պիտույքներ։ Իսկ սննդի փոխանցման մյուս եղանակը եղել է 2016 թ-ի ապրիլյան քառօրյայի ժամանակ, երբ ՊՆ-ն օրինական կարգով սնունդն ու իրերը փոխանցել է՝ զինվորներին հասցնելու համար։ Հովհաննիսյանը դժվարանում է ասել, թե այս տարբերակներից որի դեպքում է սնունդը հայտնվել Գրիգորյանի պահեստում։

«Ապրիլյան պատերազմի ժամանակ և դրանից հետո՝ մի քանի ամսվա ընթացքում, եղել են կամավորական խմբեր, որոնք եղել են բանակում և ՊԲ-ի մատակարարման տակ են եղել ամբողջությամբ, այսինքն՝ ստացել են սնունդ, հագուստ և այլն»,- ասաց նա՝ հավելելով, որ քննությունը ցույց կտա, թե ինչպես է սնունդը հայտնվել Գրիգորյանի պահեստում։

Նա նշեց նաև, որ ՊՆ-ից տարբեր պիտույքներ է ստացել ոչ միայն ԵԿՄ-ն, այլև մի շարք հասարակական կազմակերպություններ, բայց ամենամեծ բաժինը եղել է ԵԿՄ-ինը:

Ինչ վերաբերում է հայտնաբերված զենք-զինամթերքին ու մեքենաներին, ապա Արծրուն Հովհաննիսյանը նշեց, որ ինքն իրավասու չէ որևէ բան ասել։ Միայն բանակին նվիրաբերած մեքենաների մասով նշեց, որ դրանք բանակի համար անհրաժեշտ են և սխալ էր ու անընդունելի, որ դրանք զինվորին չեն հասել։

«Մեքենաներն օգտագործվում են առաջնագծից հոսպիտալ, հոսպիտալից՝ Երևան: Այս պահին անհրաժեշտ քանակով ունենք, բայց դա մշտապես օգտագործվող բան է: Ընդունելի չէ, որ որևէ միջոց չի հասել հասցեատիրոջը»,- ընդգծեց Արծրուն Հովհաննիսյանը:

Նա նաև նշեց, որ քննությունը ցույց կտա, թե պիտանի են այսօր այդ մեքենաները վարելու համար, որպեսզի հետո պարզ դառնա, կվերադարձվե՞ն դրանք բանակին, թե՞ ոչ։