Նեյմարն ու Մեսսին ձախողեցին, Ռոնալդուն փայլեց, իսկ Սալլահն այդպես էլ չխաղաց․ ԱԱ 2018

ԱԱ 2018-ը նոր-նոր է սկսվել, սակայն հիացնում է բոլորին։ Նախ պիտի նշել, որ ֆավորիտ հավաքականները բացարձակապես չեն փայլում միջին ու տեղ-տեղ նաև թույլ հավաքականների հետ հանդիպումների ժամանակ։

Մյուս կողմից՝ հիացնում են միջին դիրք զբաղեցնող հավաքականները, որոնք ցուցադրում են հրաշալի ֆուտբոլ։ Այս առաջնությունը հավաքականներից զատ նաև ֆուտբոլիստների պայքար է։ Ու պետք է նշել, որ այս առաջնությանը բախվում են Մեսսի, Ռոնալդու, Նեյմար ու Սալլահ ֆուտբոլիստները։ Առաջին հայացքից այս տղաների ազգային թիմերը գտնվում են բարձրության տարբեր հարթակներում, ու ֆուտբոլիստների անձնակայն պայքարը մի փոքր այլ կստացվի, սակայն առաջին տուրից հետո հստակ երևում է, որ այդքան էլ մեծ տարբերություն չկա։

Հանուն արդարության պիտի նշել, որ մինչ այս պահը տեղի ունեցած հանդիպումներից ամենահզորը Պորտուգալիա 3-3 Իսպանիա հանդիպում էր, որն իր գեղեցկությամբ, դիտարժանությամբ մինչ այս պահը շարունակվում է քննարկվել։

Կրիշտիանու Ռոնալդուն ապացուցում է, որ գոլահար է, հզոր ֆուտբոլիստ ու պատահականություն չի լինի, որ նա այս տարի ևս ստանա «Ոսկե գնդակը»։
Այլ կարծիք պետք է ասել Լեոնել Մեսսիի ու Նեյմարի մասին, ովքեր, մեղմ ասած, ոչնչով աչքի չընկան։

Մեսսիին իսլանդացիները փակեցին այնպես, որ այս տղան կարողանում էր ինչ-որ բան անել միայն խաղադաշտի կենտրոնում։ Իսկ Նեյմարին շվեյցարացիները ուղղակի ջարդեցին։ Իրականում շատ կոպիտ էին խաղում շվեյցարացիները Նեյմարի նկատմամբ, սակայն ամբողջ հանդիպման ընթացքում նա տարված էր բացառապես անձնական խաղով ու դրիբբլինգի ցուցադրությամբ։

Այլ է իրավիճակը Սալլահի մոտ, ով թեև վնասվածք ունի, սակայն կարող էր գոնե հանդիպման վերջին 20 րոպեներին խաղադաշտ դուրս գալ ու օգնել հավաքականին։ Բայց մարզիչը որոշեց նրան թողնել պահեստայինների նստարանին։

Այս մրցավազքում առաջատարը Ռոնալդուն է, ով արդեն առաջին խաղում ձևակերպեց հեթ-տրիկ ու լռեցրեց բոլորին։ Սա առաջին տուրն է, որը դեռ չի ավարտվել, սակայն առաջին տուրից էլ հստակ երևում է ֆուտբոլիստների մարզավիճակն ու պատրաստվածությունը։ Մնում է սպասել ու տեսնել, թե ի՞նչ կանի խաղադաշտում Սալլահը, Ռոնալդուն ինչքա՞ն գնդակ կխփի ու մինչև ո՞ւր կգնա, իսկ Նեյմարն ու Մեսսին վերջապես կանեն այն, ինչին սպասում են երկրպագուները։

NEWSPRESS.am Sport