Արցախյան ագահ հակահերոսի վերջը վաղը կտան

Ազգային անվտանգության «պադվալից» գեներալ Մանվել Գրիգորյանը նամակ է ուղարկել Ազգային ժողովի նախագահ Արա Բաբլոյանին՝ կոչ անելով իր գործընկերներին համաձայնություն տալ իրեն պատգամավորական անձեռնմխելիությունից զրկելուն՝ առանց իր ներկայության։

Մանվել Գրիգորյանը նաև նշել է, որ վստահ է, որ իր անունը կվերականգնի:

Թե այդ ինչպես է իր կործանված անունն ու պատիվը վերականգնելու մերօրյա հակահերոսը՝ դեռ պարզ չէ, ավելին՝ այդ ճանապարհն անգամ այսօր անտեսանելի է:

Սակայն, ակնհայտ է մի փաստ, ինչի մասին տարիներ շարունակ բարձրաձայնվում էր: Խոսքը սեփական երկիրը հարստահարողների ձեռքը բռնելու և կտրելու մասին է, որը սակայն չէր արվում, և դրա պատճառը Հանրապետական բուրգին սերտաճած օլիգարխան ու գեներալիտետն էր, ում թևերը կտրեց նորօրյա իշխանությունը՝ պարտադրելով ապրել բարոյականության նորմերով:

Բարոյականություն, ինչի մասին պատկերացումներն աղավաղեց Մանվել Գրիգորյանն այն փոքրիկների մոտ, որոնց նամակներն այդպես էլ տեղ չհասան:

Բարոյականություն, որից տասնյակ կիլոմետրերով հեռու է Էջմիածինն ահ ու սարսափի մեջ պահող, զինվորին ուղարկած ուտելիքով իր արջերին ու վագրերին կերակրող գեներալը:

Բարոյականություն, որն ունենալու դեպքում Մանվել Գրիգորյանը պարզապես պետք է խոստովաներ արարքն ու դրա ողջ ծանրությունը գիտակցելով՝ պատիժը կրեր ճաղերից այն կողմ՝ չշահարկելով Արցախում անցած ուղին ու ԵԿՄ-ն:

Բայց, հաշվի առնելով Գրիգորյանի պադվալային նամակը, որտեղ նշել է, որ հայտնաբերվածը ԵԿՄ-ինն է, ամենը պահվել է ԵԿՄ-ի պահեստում, պարզ է դառում, որ այդ վերջին բարոյականությունից ևս այս մարդը հեռու է:

Թե ինչ զարգացումներ կլինեն արցախյան ագահ հակահերոսի գործով, պարզ կդառնա առաջիկայում, իսկ մինչ այդ՝ սպասենք-տեսնենք, թե ինչպես է վաղը Մանվելից ձեռքերը լվանում ԵԿՄ-ն և նրան ծնած ու աճեցրած Հանրապետական կուսակցությունը:

NEWSPRESS.am