«Ճառագայթային բժշկության և այրվածքների» կենտրոնում ստուգումները ձևական բնույթ են կրել․ խախտումներ կան, պատժվողներ՝ չկան

«Ճառագայթային բժշկության և այրվածքների» գիտական կենտրոնն ավելի քան 12 մլն դրամի վնաս է պատճառել պետությանը, սակայն նրանց պատժողներ դեռ չկան։

Մոտ 10 օր առաջ ՀՀ ոստիկանությունը տարածել էր մի տեսանյութ, որտեղ ներկայացրել էր «Ճառագայթային բժշկության և այրվածքների գիտական կենտրոն» ՓԲ-ի կատարած անօրինությունների մասին։

Ոստիկանությունում նախապատրաստված նյութերով պարզվել է, որ ընկերության տնօրինությունը, պաշտոնեական դիրքն օգտագործելով, ծառայության շահերին հակառակ, պետությանը պատճառել է էական վնաս։

Օրինակ՝ մի քանի տասնյակ երեխաներ այստեղ իրենց հասանելիք բուժօգնությունը չեն ստացել. 128 երեխայից 35-ը, նախատեսված 525 օրվա փոխարեն, փաստացի շուրջօրյա բուժօգնություն է ստացել 128 օր: Բացի այդ, Առողջապահության նախարարություն են ներկայացվել մատուցված բուժման ծառայության վերաբերյալ իրականությանը չհամապատասխանող տվյալներ, որոնց հիման վրա ընկերության հաշվեհամարին է փոխանցվել շուրջ 12.100.000 դրամ ավելի գումար:

NEWSPRESS.am-ի հետ զրույցում էլ բժշկական այս հաստատության աշխատակիցները նշեցին, որ հիշյալ բացահայտումները մի չնչին մասն են այն զարհուրելի ճշմարտության, որը թաքցնում է կենտրոնի ղեկավարությունն ու հատկապես հաշվապահությունը:

Մեր զրուցակցի խոսքով, ով դեռևս չցանկացավ հրապարակել իր անունը, հենց գլխավոր հաշվապահի հովանու ներքո տարիներ ի վեր այս հաստատությունը յուրացրել է պետական գումարներ ու մեծ վնաս հասցրել թե՛ պետությանը, թե՛ քաղաքացիներին։ Մեզ հետ զրույցում նա տեղեկացրեց, որ ոստիկանության կողմից բացահայտված 25 հոգուց զատ, այս հաստատությունում փաստացի գրանցված է մի քանի տասնյակից ավելի անձ, ովքեր իրականում աշխատանքի չեն ներկայանում, սակայն նրանց համար դուրս է գրվում աշխատավարձ, որը յուրացվում է ղեկավարության կողմից:

«Յուրացվում են նաև աշխատողների համար նախատեսված հավելավճարները (премия-հեղ․)։ Բուժհաստատությունում տարիներ շարունակ բացվել են կեղծ բժշկական պատմություններ, որոնց համար պետության հատկացրած ֆինանսական միջոցները մտել են ղեկավարության գրպանը: Այս բժշկական պատմությունների հիման վրա կեղծ հիվանդին հատկացված դեղորայքը և բուժմիջոցները վաճառվում են, իսկ վաճառքից ստացված գումարը՝ նույնպես յուրացվում»,-պատմում է մեր զրուցակիցը:

Նա նշում է նաև այլ օրինախախտումներ․ բժշկական այս հաստատությունում գործում է Չեռնոբիլի պայթյունի հետևանքով առողջական խնդիրներ ունեցողներին բուժօգնություն տրամադրելու բաժանմունք, որը միանշանակ ստանում է բարեգործական միջոցներ, սակայն կասկածներ կան, որ դրանց մեծ մասը, եթե ոչ ամբողջը, չի հասնում իրական հասցեատիրոջը։

Այս ամենից բացի, ճառագայթային բժշկության և այրվածքների գիտական կենտրոնը գտնվում է ողբալի վիճակում: Կենտրոնի միջոցները չեն ուղղվում հիվանդանոցի խղճուկ վիճակի բարելավմանը, տեխնիկական սարքավորումների համալրմանը և անհրաժեշտ պարագաների ձեռքբերմանը։

Կենտրոնի աշխատակիցները փորձում են պատկան մարմիների ուշադրությունը սևեռել այն խնդրին, որ տասնյակ տարիների ընթացքում բժշկական հաստատության գլխավոր հաշվապահը դիզել է մեծ կարողություն (անշարժ գույք, մեքենաներ)՝ անօրինական հարստացման շնորհիվ, սակայն մինչ օրս չի ենթարկվել պատասխանատվության։

Այլ կերպ ասած՝ խախտումներ կան, պատժվողներ՝ չկան։

Աշխատողներն ուզում են հավատալ, որ անօրինությունները շատ շուտով կբացահայտվեն, և մեղավորները կպատժվեն օրենքի ողջ խստությամբ:

Արմինե Մկրտումյան