«Քանի դեռ ես ողջ եմ, Իկարդին չի խաղա այս հավաքականում»․ ծաղրածու Մեսսիի «կլանն» ու թուլամորթ Սամպաոլին․ արգենտինական խայտառակությունը

2017 թվականի մայիսի 26-ին բոլորն արդեն գիտեին, որ Լուիս Էնրիկեն այլևս չի շարունակի գլխավորել կատալոնական «Բարսելոնան»։ Այդ օրը տեղի ունեցած ասուլիսի ժամանակ Էնրիկեն հանդես եկավ հայտարարությամբ, որին ոչ բոլորն ուշադրություն դարձրին։ Հայտարարությունը մի քանի օր քննարկվեց ու մոռացվեց։ Էնրիկեն նշել էր․ «Այնպիսի տպավորություն ունեմ, որ հեռանում եմ կրկեսից, սակայն չեմ ասի, թե ով է այստեղ ծաղրածուն»։

Էնրիկեն ակնարկեց, որ թիմում կա ծաղրածու ու հավանաբար այդ ծաղրածուն դարձավ պատճառ, որ Էնրիկեն լքեց «Բարսելոնան»։

2018 թվականի մայիսին, երբ արդեն պարզ դարձավ, որ Արգենտինայի հավաքականի հայտացուցակից բացակայում է իտալական «Ինտերի» հարձակվող Մաուրո Իկարդին, Արգենտինայի հավաքականի երբեմնի լեգենդները սկսեցին խոսել։ «Ինտերի» նախկին ֆուտբոլիստ Էրնան Կրեսպոն նշեց․ «Մեսսիի հետ կոնֆլիկտի պատճառով Իկարդին չի կարողանա մեկնել Ռուսաստան: Կարծում եմ, որ դա սարսափելի սխալ է, Արգենտինային անհրաժեշտ է Մաուրոյի նման հարձակվող»։

Իկարդիի՝ հավաքական չհրավիրվելու պատճառի մասին գիտեն անգամ բակում ֆուտբոլ խաղացող 10-12 տարեկան երեխաները, ովքեր գիտեն, որ Մեսսի-Իկարդի կոնֆլիկտը սկսվել է այն ժամանակ, երբ Մաուրո Իկարդին գրավեց Արգենտինայի հավաքականի նախկին հարձակվող, Լեո Մեսսիի թիմակից Մաքսի Լոպեսի կնոջ սիրտը՝ դառնալով ընտանեկան գժտության մեղավոր:

Իսկ Սամպաոլին իրեն ու բոլորին դրեց ապուշի տեղ ու ասաց մի հեքիաթ, թե ինչո՞ւ Իկարդին չի մեկնի Ռուսաստան․ «Իկարդին, Պերոտին, Ալեխանդրո Գոմեսն ու Լաուտրո Մարտինեսը մեզ հետ չեն մեկնի Ռուսաստան, սակայն նրանք մնում են լավ ֆուտբոլիստներ և կարող էին լինել մեր հարձակման գծում»։

Պետք է «խենթուկ» լինել, կամ էլ սուտասան այսպիսի հայտարարություն անելու համար։ Այն, որ Իկարդին այս պահի դրությամբ աշխարհի 3 լավագույն կենտրոնական հարձակվողներից մեկն է, փաստ է։ Այդ մասին կարող են փաստել մասնագետներն ու վիճակագրությունը։ Փաստացի Մեսսիի «կլանը» չթողեց, որ այս թիմում խաղա Իկարդին։ Մեսսին հայտարարություն չարեց, սակայն այդ հայտարարությունը բոլորը գիտեն ու պատկերացնում են, թե ինչպիսին է․ «Քանի դեռ ես ողջ եմ, Իկարդին չի խաղա այս հավաքականում»։

Մինչ Աշխարհի առաջնության սկսվելը, գրեթե բոլորը նշում էին, որ Արգենտինայի ձախողման դեպքում բոլորը կհոշոտեն Սամպաոլի-Մեսսի զույգին։ Ու տեսականորեն Արգենտինան շանսեր գրեթե չունի հաջորդ փուլ դուրս գալու համար, իսկ այս դեպքում Մեսսիին ու Սամպաոլիին Արգենտինայում կընդունեն աներևակայելի վատ։

Տեսնելով Արգենտինայի հավաքականի 2 խայտառակ հանդիպումները՝ հստակ երևում է, որ թիմը չունի գոլահար։ Մյուս կողմից՝ կարելի է հարց տալ Սամպաոլիին ու նշել, թե ինչո՞ւ են պահեստայինների նստարանին նստած Դիբալան ու Հիգուաինը։ Կարծում ենք, որ այս հարցին ևս մի «խենթ ու խելառ» պատասխան կտա մասնագետը։ Ու պետք է փաստել, որ արգենտինական խայտառակության մեղավորը մի փոքր տղայի կամակորությունն է, ով կորցրել է իր երբեմնի հզոր մարզավիճակն ու թողել է բացառապես անունը։

Արգենտինական խայտառակության մեղավորը մի մարզիչ է, ով լսում է կամակոր ու լավ ֆուտբոլից բավականաչափ հեռացած տղային։ Այս խայտառակության հետևում կանգնած է մի փոքր կլան, ով արդեն մի քանի տարի շարունակ որոշում է, թե ով է խաղալու հավաքականում և ով ոչ։ Հավանաբար, Իկարդին հիմա ծիծաղում է, Արգենտինայում սպասում են կատաղած երկրպագուները, իսկ շատերը հասկացան, թե ով էր Էնրիկեի ակնարկած ծաղրածուն։

NEWSPRESS.am Sport