Հիգիենայի պարագաների դիմաց զինծառայողներին տրվում է դրամական փոխհատուցում. հարցը 2015թ-ից հանված է. Սենոր Հասրաթյան (տեսանյութ)
Արցախի ՊԲ խոսնակ Սենոր Հասրաթյանն արձագանքել է մամուլում տեղ գտած մի հրապարակման, ըստ որի՝ ՊԲ-ում ՀՀ վարչապետ Նիկոլ Փաշինյանի կոչը չեն լսել և զինծառայողներին հիգիենայի պարագաներ չեն տրամադրում: Սենոր Հասրաթյանն իր ֆեյսբուքյան էջում պարզաբանում է տվել:
«Ի հավելումն «Հայկական ժամանակ» օրաթերթում հունիսի 28-ի՝ «Վարչապետի կոչին հետևելով՝ ահազանգ ՀԺ-ին. զինծառայողներին հիգիենայի պարագա չե՞ն տրամադրում» վերտառությամբ հրապարակման մեջ իմ կողմից տրված պատասխանի՝ տեղեկացնում եմ, որ 2015թ.-ից սկսած զինծառայողներին հիգիենայի պարագաներ (սափրվելու մածուկ, ատամի մածուկ, խոզանակ, ածելի և այլն) հատկացնելու հարցը հանված է իրային ապահովման նորմացույցից: Դրա դիմաց զինծառայողներին տրվում է դրամական փոխհատուցում (աշխատավարձ)՝ կախված զինծառայողի զբաղեցրած պաշտոնից և կոչումից: Ըստ այդմ՝ վերոնշյալ հիգիենայի պարագաները ձեռք է բերում զինծառայողը:
Ստորև ձեզ եմ ներկայացնում նաև ս.թ. հունիսի 16-ին Երևանի «Հաղթանակ» զբոսայգում բանակի թիկունքային ապահովման միջոցների ցուցադրության ժամանակ ԶՈՒ թիկունքի պետ - վարչության պետ, գեներալ-մայոր Նորայր Յոլչյանի կողմից վերոնշյալ հարցին առնչվող պարզաբանումից հատված»,- գրել է Հասրաթյանը և տեղադրել տեսանյութ:
