Ռումինիայում ՀՀ դեսպանն այցելել է Դումբրավեն քաղաք

Հունիսի 30-ից հուլիսի 1-ը Ռումինիայում ՀՀ դեսպան Սերգեյ Մինասյանն այցելեց Տրանսիլվանիայի Դումբրավեն` նախկին Եղիսաբեթուպոլիս քաղաք, որտեղ գտնվում է 18-րդ դարի բարոկկո ոճի Սուրբ Եղիսաբեթ հայ կաթոլիկ եզակի բազիլիկ եկեղեցին (1766թ.):

Ինչպես տեղեկացրին ՀՀ արտգործնախարարության լրատվության և հանրային դիվանագիտության վարչությունից, այցի ընթացքում դեսպան Մինասյանը հանդիպում ունեցավ Դումբրավենի քաղաքապետ Էմիլ Դարլոշանի և ՌՀՄ Դումբրավենի մասնաճյուղի նախագահ Իոն Կալինեսկուի հետ: Հանդիպման ընթացքում քննարկվեցին Սուրբ Եղիսաբեթ եկեղեցու և այնտեղ պահվող մշակութային արժեքների պահպանմանն ուղղված քայլերը:

Նույն օրը դեսպան Մինասյանը մասնակցեց և ելույթ ունեցավ Ռումինիայի Հայոց միության Դումբրավենի մասնաճյուղի պատմական թեմատիկայով 15-րդ ամենամյա գիտական սիմպոզիումին: Ելույթով հանդես եկավ նաև Դումբրավենի քաղաքապետ Էմիլ Դարլոշանը:

Սիմպոզիումի ընթացքում ներկայացվեցին գիտական զեկույցներ՝ նվիրված Առաջին համաշխարհային պատերազմին հայերի մասնակցությանը, ցեղասպանությունից Ռումինիայում ապաստան գտած հայերի հաստատմանը, երկու աշխարհամարտերի միջև ընկած ժամանակահատվածում Ստունգայի որբանոցի պատմությանը:

Այնուհետև Սուրբ Եղիսաբեթ եկեղեցում տեղի ունեցավ դասական երաժշտության համերգ:

Այցի շրջանակներում Հայաստանի դեսպանը նաև ծանոթացավ Սուրբ Եղիսաբեթ և ևս երկու հայ կաթոլիկ եկեղեցիներին, եկեղեցու գրապահոցին, որտեղ պահվում են 17-18-րդ դդ. վենետիկյան հազվագյուտ հնատիպ հայալեզու եկեղեցական և այլ գրքեր:

Տեղեկանք. Ռումինիայի Դումբրավեն քաղաքը (Եղիսաբեթուպոլիս)՝ Գեռլա-Արմենոպոլիսի հետ միասին, Տրանսիլվանիայի «հայկական» քաղաքներից է: Հայերն այստեղ հաստատվել են 17-րդ դարի վերջում և նշանակալի ավանդ բերել քաղաքի տնտեսական և մշակութային զարգացմանը: 2012թ. հոկտեմբերին բարեկամության և համագործակցության համաձայնագիր է ստորագրվել Դումբրավենի և Հայաստանի Նոյեմբերյան քաղաքի միջև: