Արարատ Խանդոյանի վաղաժամկետ ազատման գործով դատական նիստը հետաձգվեց. «Արմենպրես»

Արարատ Խանդոյանի վաղաժամկետ ազատման գործով դատական նիստը հետաձգվեց՝ դատախազի՝ նիստին չներկայանալու պատճառով: Շիրակի մարզի ընդհանուր իրավասության առաջին ատյանի դատարանում հուլիսի 2-ին քննվելու էր Արարատ Խանդոյանին պատժի կրումից վաղաժամկետ ազատ արձակելու միջնորդությունը։

Միջնորդություն ներկայացվել էր փաստաբան Արա Ղարագյոզյանի կողմից։ Ինչպես տեղեկացնում է «Արմենպրես»-ը, Արարատ Խանդոյանը բերման էր ենթարկվել 2016 թվականի հուլիսի 20-ին ՊՊԾ գնդի գրավման դեպքերից հետո: Նրան մեղադրանք էր առաջադրվել ՀՀ քրեական օրենսգրքի 225-րդ հոդվածով՝ զանգվածային անկարգություններին մասնակցելը, որում եւ մեղավոր էր ճանաչվել, դատապարտվել երեք ու կես տարվա ազատազրկման: Արարատ Խանդոյանը պատիժը կրում է Արթիկ քրեակատարողական հիմնարկում:

Նիստը հետաձգվեց դատախազ Կիրակոսյանի չներկայանալու պատճառով։ Դատավորն ընթերցեց դատախազի գրությունը, որով նա տեղեկացնում էր, թե աշխատանքի ծանրաբեռնվածության պատճառով չի կարող մասնակցել հիշյալ դատական նիստին։ Արարատ Խանդոյանին զայրացրեց այս հանգամանքը և, չսպասելով դատավորի որոշմանը, նա դուրս եկավ դահլիճից։ Նիստը նախագահող դատավոր Ա. Թադևոսյանը որոշեց հաջորդ դատական նիստը նշանակել հուլիսի 12-ին՝ ժամը 12-ին:

Արմենուհի Մխոյան