ԿԳ նախարարի նոր որոշումները կարող են կոռուպցիոն նոր ռիսկեր ի հայտ բերել․ կրթության փորձագետ

Կրթության և գիտության նախարար Արայիկ Հարությունյանը ֆեյսբուքյան «լայվ»-ով հայտարարել է, որ 

«հաջորդ տարվանից կլինի առցանց համակարգ՝ կայք, որտեղ սեպտեմբերից առաջին դասարան հաճախող երեխայի ծնողը կմտնի, կբացի տվյալ դպրոցի էջը, և այնտեղ գրված կլինի՝ որքան թափուր տեղ կա առաջին դասարանցիների համար․․․ Երբ որ տեղերը լրանան, այլևս որևէ մեկը՝ ո՛չ տնօրենը, ո՛չ ծնողը, չեն կարողանա այդ թիվը գերազանցել և ավել աշակերտներ գրանցել․․․»։

Այլ կերպ ասած՝ դպրոցի ընդունելության դիմումի ձևը լինելու է էլեկտրոնային։ Կրթության փորձագետ Սերոբ Խաչատրյանի դիտարկմամբ, այս որոշումով դպրոցների մեծ մասի համար ոչ մի փոփոխություն չի լինի, այն կազդի միայն մի քանի հերթափոխով աշխատող դպրոցների վրա։

NEWSPRESS.am-ի հետ զրույցում նա նկատեց, որ կան դպրոցներ, որոնք ունեն ավելի շատ աշակերտ, քան իրենց տարածքը հնարավորությսւն է տալիս, և այս որոշման նպատակն այդ դպրոցներում աշակերտների թիվը բալանսի բերելն է։

Սա թերևս որոշման հետ կապված միակ դրական արդյունքը կարող է լինել, իսկ իրականում, ըստ փորձագետի, այն խնդիրների կստեղծի։ 

«Օրինակ՝ ծնողները, ովքեր ուզում են երեխային տանել թաղի դպրոց, կարող են պարզել, որ այդ դպրոցում այլևս տեղ չկա, արդեն փակվել է։ Այդ ծնողը կարող է ասել՝ ի՞նչ է, ես իրավունք չունե՞մ ընտրել իմ երեխայի դպրոցը։ Կամ ծնողն ուզում է տանել իր աշխատավայրին մոտ գտնվող դպրոց, ու պարզվում է, որ այլևս տեղեր չկան․․․»,-ասում է փորձագետն ու վստահեցնում, որ նմանատիպ դժվարություններ և խնդիրներ այս որոշումն անպայման կառաջացնի։

Բացի այդ՝ այս որոշումը ենթադրում է նաև կոռուպցիոն նոր ռիսկեր։ Սերոբ Խաչատրյանը բերում է օրինակներ․

«Օրինակ՝ պարզ չի՝ ասենք, 120 աշակերտի ընդունեցին, տարվա ընթացքում 2 հոգի գնաց այլ դպրոց, 2 թափուր տեղ բացվեց, հիմա ինչպե՞ս է որոշվելու՝ այդ տեղերը զբաղեցնելո՞ւ են, թե՞ ոչ, կամ ով հերթի մեջ առաջինն է նա է ընդունվելո՞ւ, թե՞ ինչ-ինչ ճանապարհներով հարցեր են լուծելու, այսինքն, չի բացառվում, որ համակարգի կառավարիչների կողմից ինչ-որ միջամտություն լինի»,-կարծում է փորձագետը՝ նշելով, որ կառավարիչը կարող է, օրինակ, մի 5 հոգու արտահերթ գրանցել։

Նա նկատում է նաև, որ սա դպրոցների ներքին մրցակցություն կարող է առաջացնել։ Եթե թաղամասում կա երկու դպրոց՝ մեկը բարվոք, իսկ մյուսը՝ ոչ այնքան, ապա ծնողը պետք է փորձի լավ դպրոցը տանել, ու կողքի դպրոցը ևս պետք է մտածի բարեկարգման մասին։ Սակայն մյուս կողմից էլ՝ ընտրության հնարավորությունը  սահմանափակվում է։

«Օրինակ՝ ես վատ բաներ եմ լսել այս մի դպրոցի մասին՝ ենթադրենք՝ ուսուցիչը կամ տնօրենը վատն են, իսկ թաղամասում ընդամենը երկու դպրոց է, բայց լավ դպրոցում տեղ չկա, ինձ ասում եք տար այն վատ համբավ ունեցող դպրոցը. փոխելո՞ւ են ուսուցիչներին, տնօրենին՝ իհակե ոչ․․․ Եթե նման որոշում կայացվում է, պետք է նաև պետությունն այս խնդիրների մասին մտածի»։