«Չեն ասել, թե մի քիչ քեզ թափ տուր, թերթից մի կարդա լսարանում, մի թելադրի, այդպես ամեն մարդ կարող է դասախոս աշխատել»

Շախմատ առարկայի մեթոդաբանությունը կփոխվի: «Ազատության» եթերում հայտարարեց Կրթության և գիտության նախարարի տեղակալ Հովհաննես Հովհաննիսյանը:

Հարցին՝ շախմատ առարկան շատ չէ՞ ակադեմիկացված, արդյոք դա դպրոցակականների համար ծանրաբեռնվածություն չի՞ առաջացնում, նախարարի տեղակալը պատասխանեց. «Շախմատի հետ կապված՝ դժգոհություններ ստացել ենք: Խնդիրը մեթոդաբանական դաշտում է՝ ինչպես ուսուցանել առարկան: Շախմատով տրամաբանությունը կարելի է զարգացնել:

Ընդունում ենք, որ մեթոդաբանական խնդիրներ կան: Որոշակի ինստիտուցիոնալ փոփոխություններ, երբ տեղի ունենան շուտով, համապատասխան կառույցն այդ հարցն իր օրակարգում կներգրավի, ավելի մատչելի կդարձնեն, կուղղեն դեպի տրամաբանական զարգացում»:

Դիտարկմանը, թե բուհերում ուսանողներին վատ առաջադիմության համար չեն հանում, որովհետև դիտարկում են որպես «փող բերող», Հ. Հովհաննիսյանը պատասխանեց. «Մեծամասամբ կիսում եմ խնդիրը: Տարիներ շարունակ բուհը դիտարկվել է որպես սոցիալական միջավայր: Ասել են՝ չկրճատենք վատ դասախոսին, երկու երեխա ունի, ընտանիք է պահում, բայց չեն ասել, թե մի քիչ քեզ թափ տուր, թերթից մի կարդա լսարանում, մի թելադրի, այդպես ամեն մարդ կարող է դասախոս աշխատել: Այսպես կրթության որակը գնալով ընկել է, բուհը լուծել է աշխատատեղերի խնդիր: Այստեղ լուրջ բարեփոխումներ են պետք»:

Փոխնախարարը նշեց, որ ԵՊՀ-ում գրված են առարկաներ, իսկ Ամերկյան համալսարանում ուսանողն է ընտրում դասախոսին և դասախոսը շահարգրգռված է հետաքրքիր լինել, որպեսզի անգործ չմնա: «Լեկցիա թելադրելը, պարտադրել, որ գրեն այդ լեկցիան... նման դասախոսներին առաջինը պետք է հեռացնել, չթողնել համալսարան»,- ասաց Հովհաննիսյանը: