Ասում են՝ փոխվել ա, փոխվել ա, ոչ մի բան էլ չի փոխվել․ Գեղարդում ջուր չկա, ճանապարհ չկա, տրանսպորտ չկա, աշխատանք չկա. հույսը միայն Փաշինյանն է (վիդեո)

«Կա՛մ թող գան, գյուղը քանդեն, մեզ էլ հեռացնեն, կա՛մ էլ մեր ջրի հարցը լուծեն»։ Կառավարության դիմաց ինչպես այս, այնպես էլ գյուղի այլ խնդիրներ լուծելու պահանջներով էին եկել գեղարդցիները։

NEWSPRESS.am—ի հետ զրույցում Գեղարդի բնակիչներն ասացին, որ շատ խնդիրներ կան, բայց թիվ մեկ խնդիրը ջուրն է։

«Ո՛չ անասունին ջուր կա, ո՛չ այգուն, ո՛չ էլ մեզ։ 85 տարեկան մարդ եմ, սենց բան չեմ տեսել։ Բերք ու բարիքը հողից ենք ստանում, բայց որ էդ հողը չջրենք, որտեղի՞ց ստանանք։ Առանց էդ էլ աշխատանքի տեղ չկա»,- ասում է մեր զրուցակիցը։

Մեկ այլ գյուղացի էլ նկատում է․ «Էս ո՞ր թիվն ա, գյուղում տրանսպորտ չկա, ճանապարհ չկա, ասում են՝ գիծը ծախված ա, գծի տերը չի թողնում, որ ձեր գյուղ տրանսպորտ մտնի․ էս ի՞նչ երկիր ա, էս որտե՞ղ ենք ապրում մենք։ Ասում են՝ փոխվեց, փոխվեց, փոխվեց, ի՞նչն ա փոխվել, մենք չենք տեսնում այդ փոփոխությունը, ոնց անտերություն կար, տենց էլ մնացել ա»։

Գյուղացիները նշում են, որ գյուղից Երևան հասնելու և վերադառնալու համար շուրջ 5000 դրամ է պահանջվում․ գյուղից անմիջապես մայրաքաղաք եկող տրանսպորտ չկա։ Գյուղացիներն ստիպված են տաքսիով հասնել Գողթ, այնտեղից էլ տրանսպորտով Երևան գալ։ Դա նրանց վրա նստում է մոտ 2000 դրամ, և նույնքան էլ պահանջվում է գյուղ վերադառնալու համար, իսկ տաքսին Երևան է հասցնում 2500 դրամով, նույնքան էլ նրանց համար արժենում է վերադարձը: 

«Անապատում ենք ապրում, անապատում, որ քաղաքին կպած ենք, քաղաքից 2 կմ է հեռու։ Սաղ աշխարհը տուրիստ ա գալիս Գեղարդ, մենք երկու կիլոմետրի վրա տրանսպորտ չունենք»,- ասում է մեկ այլ գյուղացի, իսկ մյուսն էլ նրան հավելում է․ «Գեղ կանգնի՝ գերան կկոտրի, մենք էլ ենք գեղով եկել ենք կառավարություն․․․»։

Գեղարդցիների միակ ու վերջին հույսը մնացել է վարչապետ Նիկոլ Փաշինյանը, դրա համար էլ նրանք այսօր եկել էին կառավարություն: 

Մանրամասները՝ NEWSPRESS.am-ի տեսանյութում