Արդյո՞ք փաշինյանական թևը մարտը կավարտի նոկդաունով

Երևանի քաղաքապետի ընտրությունը կկայանա մի քանի օր անց՝ հուլիսի 16-ին: Այս մասին այսօր, Երևանի ավագանու արտահերթ նիստի ընթացքում, հայտարարեց նիստը վարող, փոխքաղաքապետ Կամո Արեյանը: Ու թեև ավագանու ԵԼՔ խմբակցությունն առաջարկում էր քաղաքապետի ընտրությունն անցկացնել օգոստոսի 8-ին, այս առաջարկը չընդունվեց, քանի որ քաղաքապետարանում հանրապետականները դեռ մեծամասնություն են, և 34 հոգի դեմ քվեարկեց ԵԼՔ-ի այս առաջարկությանը: Հետաքրքիր է, որ նույն հանրապետականները նույն կերպ կարող են վաղը քվեարկել իրենց նախընտրելի քաղաքապետի օգտին, քանի որ Ազգային ժողովում նրանց մի թևը ընկրկել է, ապա նույնը չի կարելի ասել ավագանու մասին, որտեղ հանրապետականների ձայնը դեռ կարող է որոշիչ լինել:

Եթե, այնուամենայնիվ, հանրապետականները որոշեն չհեռանալ խորտակվող նավից և առաջադրեն քաղաքապետի իրենց թեկնածուին, հարց է մնում՝ ի՞նչ է լինելու «Երկիր Ծիրանի» և ԵԼՔ խմբակցությունների վիճակը. նրանք դատապարտված են լինելու աշխատել հանրապետական քաղաքապետի հե՞տ: Թերևս, ոչ: Նիկոլ Փաշինյանը հանրապետական քաղաքապետ ունենալու համար չէր հեղափոխություն անում, հետևաբար, մեզ սպասվում են թեժ զարգացումներ ու անգամ «ջրհեղեղ», ինչպես այսօր ավագանու նիստի ընդմիջման ժամանակ լրագրողների հետ զրույցում ասաց ԵԼՔ խմբակցության ղեկավար Դավիթ Խաժակյանը, ով նշեց, որ հուլիսի 16-ին քաղաքապետի ընտրություն կազմակերպելով, ամենամեծ վնասը կհատկացնեն կառավարությանը, որը ընտրություն կազմակերպելու համար լուրջ ֆինանսական միջոցներ պետք է հատկացնի. «Այդ գինը չափազանց մեծ է, որը պետությունը պետք է վճարի»,-ասաց Խաժակյանը՝ պնդելով, որ սա սաբոտաժ է կառավարության դեմ: Փաստորեն, քաղաքապետի ընտրությունը հուլիսի 16-ին սահմանելով, առաջին ձեռնոցը նետված է, որի արդյունքում կարող է լուրջ մենամարտ ծավալվել: Իսկ թե ով որ ռինգում կհաղթի և արդյո՞ք փաշինյանականները մարտը կավարտեն նոկդաունով, ցույց կտա ժամանակը: 

NEWSPRESS.am