Գետազատ-Երևան երթուղու տասնյակ ուղևորներն ահազանգում են՝ երթուղին անմխիթար վիճակում է

Գետազատ-Երևան երթուղու տասնյակ ուղևորներն ահազանգում են՝ արդեն տևական ժամանակ Գետազատ-Երևան երթուղին, մեղմ ասած, անմխիթար վիճակում է։

Նրանք NEWSPRESS.am-ի հետ զրույցում նկատում են, որ չկա տարրական հարգանք ուղևորի նկատմամբ, ովքեր տարիներ շարունակ օգտվում են երթուղուց ու բարոյապես ու նյութապես տուժում են պատասխանատու մարմինների անտարբեր ու սխալ կազմակերպված աշխատանքի պատճառով:

«Մենք մեր նյարդերն ենք փչացնում ու ժամանակն էս ճանապարհներին, տարրական պայմաններ չկան մեր երթուղին նորմալ ապահովելու համար»,- ասում են ուղևորները։ Նրանք իրենց տարբերակն են առաջարկում երթուղին բարելավելու համար։

Ուղևորների դիտարկմամբ՝ նախ հարկավոր է վերանայել չվացուցակը, քանի որ գործող չվացուցակով հնարավոր չէ ժամանակին հասնել պահանջվող վայր՝ աշխատանքի կամ դասի։

«Ավտոբուսները ժամը մեկ են շարժվում, ենթադրենք՝ իմ աշխատանքը սկսվում է 9:30, ի՞նչ անեմ՝ Երևան հասնելու համար 45 րոպե շո՞ւտ, թե՞ 45 րոպե ուշացած գնամ, ընտրության հնարավորություն չկա»,- ասում է մեր զրուցակիցներից մեկը։

Մեկ այլ ուղևոր էլ նշում է, որ Երևանից Գետազատ վերջին ավտոբուսը շարժվում է 19:50-ին։

«Այդ որոշումը կայացնելիս մոնիթորի՞նգ է անցկացվել, թե՞ որոշվել, որ Գետազատում օրը վերջանում է ժամը 19-ին: Երկրորդ հերթով դասի գնացող ուսանողները կամ մարդիկ, որ ժամը 19-ին են վերջացնում աշխատանքը, ստիպված են լինում ավելորդ գումար ծախսել տաքսիների համար կամ, լավագույն դեպքում, վազել վերջին ավտոբուսի հետևից»,-ասում է մեր զրուցակիցը:

Ուղևորները պահանջում են նաև արմատապես վերանայել վարորդների կազմը` բարոյական, հոգեբանական, հիգիենիկ և պրոֆեսիոնալ նկատառումներով:

«Ամբողջ ճանապարհին հեռախոսով խոսում են, ամեն 50 մետրը մեկ կանգնում, մարդ վերցնում, ապրանքի պես լցնում իրար գլուխ։ Անպայման պետք ա մի մարդ դուրս ընկնի մեքենայից, որ հասկանա՞ն հարցի լրջությունն ու ուշադրություն դարձնեն։ Շատ ժամանակ խցկվելու տեղ էլ չի լինում»,- սրտնեղած ու չհանգստանալով պատմում էին ուղևորները։

Նրանք խնդրում և պահանջում են ավելացնել գոնե մեկ ավտոբուս երեկոյան ժամը 21-ի համար, կամ 21:10-ին Երևանից շարժվող Դվին երթուղին այնպես համակարգել, որ գոնե այդ ժամին սպասարկի նաև Գետազատի ու հարակից գյուղերի ուղևորներին. (ընդամենը 700 մետր ավել ճանաարհ անցնելով՝ հնարավոր է սպասարկել տասնյակ մարդկանց), ավելացնել ավտոբուսների քանակը՝ գոնե առավոտյան ու երեկոյան պիկ ժամերին, որ մարդիկ ստիպված չլինեն իրենց կամքին հակառակ ուշացած տեղ հասնել: Գոնե առավոտյան ժամերին երթուղին այնպես համակարգել, որ ավտոբուսն անցնի Գործարանային մետրոյի մոտով, որպեսզի շատ-շատ ուշացող մարդիկ 5 րոպե ժամանակ տնտեսեն:

Գետազատ-Երևան երթուղու տասնյակ ուղևորներն ուզում են հավատալ և նաև լիահույս են, որ իրենց խնդրի մասին բարձրաձայնվի՝ այն, եթե ոչ անմիջապես, ապա գոնե տեսանելի ապագայում, լուծում կստանա։