Ի՞նչ են քննարկել Փաշինյանն ու Տեր-Պետրոսյանը

«Երբ իմացա, որ ինձ հետ հանդիպելու ցանկություն կա, հրավիրեցի առաջին նախագահին կառավարական առանձնատուն, նստել ենք, սուրճ ենք խմել, զրուցել ենք․․․»։ Լրագրողների հետ հանդիպմանն ասաց վարչապետ Նիկոլ Փաշինյանը՝ անդրադառնալով Լևոն Տեր-Պետրոսյանի և իր հանդիպանը, որի ժամանակ խոսել են Արցախի հիմնախնդրի մասին։

Փաշինյանը նշեց, որ առաջին նախագահի հետ զրույցն օգտակար էր, թեև չի եղել այնպիսի նոր տեղեկություն, որի մասին ինքը չի իմացել։ Վարչապետն ընդգծեց նաև, որ հանդիպման ժամանակ ներքաղաքակա հարցեր չեն քննարկվել, այլ միայն խոսել են Արցախի խնդրի շուրջ։

Փաշինյանի կարծիքով՝ սխալ է, երբ առհասարակ ԼՂՀ խնդրի շուրջ խոսելիս՝ հարցնում են, թե արդյոք Արցախի հակամարտության կարգավորման հարցում «տարածքներ՝ կարգավիճակի դիմաց» լուծումն ընդունելի՞ է։

«Որևէ մեկը հարց տվե՞լ է՝ այդ լուծումն Ադրբեջանի համար ընդունելի՞ է, թե՞ ոչ: Ես միշտ հայտարարել եմ այն մասին, որ փոխզիջման համար կարևոր է, որ երկու կողմը պատրաստակամ լինի զիջման: Ուզում եմ հասկանալ, թե ինչո՞ւ ենք ցանկանում քննարկել մեր պատրաստակամությունը փոխզիջման գնալու, եթե ակնհայտ է, որ Ադրբեջանը պատրաստ չէ փոխզիջման: Երբ մենք ուղերձ կստանանք, որ Ադրբեջանը նույնպես հակված է փոխզիջման, այդ ժամանակ կքննարկենք ու կքննարկենք ոչ թե կառավարության մակարդակով, այլ ազգովի, որ հասկանանք, թե մեզ համար փոխզիջման ինչի հնարավորություն գոյություն ունի»,- ասաց Փաշինյանը՝ հավելելով, որ ԼՂՀ հակամարտության կարգավորման հարցում բացառում է այնպիսի լուծում, որն ընդունելի չի լինի մեր ժողովրդի համար:

Նա նշեց նաև, որ ինչպես նախկինում հայտարարել է, այսօր ևս պատրաստ է բանակցել Ադրբեջանի նախագահի հետ։

«Բանակցային նյութ կա, պետք է ծանոթանանք դրանց, վերլուծենք և բանակցենք: Բանակցությունները ևս օգտակար են, որովհետև պետք է որոշակի վստահության մթնոլորտ ստեղծվի հարցի կարգավորման համար: Առանց դրա՝ հարցի կարգավորում հնարավոր չէ»,- ասաց Փաշինյանը։