Վանաձորի պետհամալսարանի դասախոսը 17 մլն դրամ արժողությամբ սարք է յուրացրել․ ուսանողները դժգոհում են կաշառակեր դասախոսներից

Վանաձորի Հովհաննես Թումանյանի անվան պետական համալսարանի ուսանողներին «քամել» են։ Ամբողջ կրթօջախը մեկ-երկու դասախոսի ձեռքում է, ովքեր արդեն մի քանի տարի է՝ իրենց կաշառակերությամբ գցում են ամբողջ համալսարանի վարկանիշը՝ հիասթափեցնելով ուսանողներին։

Այս մասին NEWSPRESS.am-ին ահազանգում են վանաձորցիներ, որոնց զավակները տուժել են դասախոսների կամայականություններից։ Մեր զրուցակիցները, ցանկանալով մնալ անանուն (քանի որ նրանցից մի քանիսի երեխաները դեռ սովորում են համալսարանում), նշեցին մի քանի անուն։

Մասնավորապես, դժգոհություններ եղան ֆիզիկական դաստիարակության և ԱԻ հիմնահարցերի ամբիոնի վարիչ Զավեն Էվոյանից և քիմիայի ամբիոնի վարիչ Հրաչիկ Ղազարյանից։ Մեզ ահազանգող ծնողները հնչեցրին այլ անուններ ևս, որոնք խոստանում ենք հրապարակել հաջորդիվ։

Իսկ առայժմ, «ծաղկեփնջից» առանձնացնենք այս երկուսին։

Մեր աղբյուրի փոխանցմամբ՝ Հրաչիկ Ղազարյանի ամենաթողության պատճառը նրա որդին է՝ ոստիկանությունում վարչության պետ աշխատող Արամ Ղազարյանը, որի շնորհիվ նրա հորը մինչ օրս հանդուրժում են համալսարանում։ Եվ ոչ միայն նրան․ Ղազարյանն իր հետ համալսարան է բերել նաև իր աղջկան՝ Արմինե Ղազարյանին, և որպես օգնական՝ ձևակերպել իր իսկ ղեկավարած ամբիոնում։ Այստեղ են աշխատում նաև նրա կինը և հարսը։

Ասում են, որ այս «ընտանեկան խմբավորումը» համալսարանի հաշվին «բիզնես է անում»։ Մասնավորապես, պատմում են, որ ինստիտուտում գործում է դեղագործ քիմիայի բաժին, որի անվան տակ համալսարանի համար ձեռք է բերվել 17 մլն դրամ արժողությամբ սարք։ Այն հնարավորություն է տալիս խոտաբույսերի ու տարբեր նյութերի խառնուրդից դեղահաբեր պատրաստել։ Մեր զրուցակիցը վստահեցնում է՝ այդ սարքավորումն այժմ Հրաչիկ Ղազարյանի տանն է՝ սեփական նպատակներին ծառայեցնելու համար։

«Չկա մի ուսանող, որ ավարտած լինի ու Ղազարյան Հրաչիկին փող տված չլինի։ Աղջկան էլ տարել ա, զոռբայությամբ դոցենտ ա նշանակել, ու ընտանիքով բիզնես են անում։ Էս խեղճ երեխեքի հոգին հանեցին»,- նեղսրտած պատմում էր ուսանողներից մեկի մայրը։

Հարցին, թե ինչո՞ւ ձայն չեն հանել մինչև հիմա և ինչո՞ւ են հանդուրժել նրան՝ ծնողը նեղսրտած արձագանքեց։

«Ա՛յ ցավդ տանեմ, ոչ ոք նրա հախից չի կարում գա, տղով վախացնում ա ու մեզ քամում։ Իմացող աշակերտը տեղ չունի նրա մոտ․ էնքան ա նեղը գցում, որ ստիպված ասում ես՝ առ, էս փողը տար ըռխով տուր, մենակ պրծնենք էս ինստիտուտից»։

Հրաչիկ Ղազարյանի «հերոսություններն» այսքանով չեն ավարտվում, բայց այս հրապարակման ընթացքում բավարարվենք այսքանով։

Ինչ վերաբերում է Զավեն Էվոյանին, ապա, ինչպես նկատեց մեր զրուցակիցներից մեկը, «այս մարդուն փողոցից բերել, դասախոս են սարքել»։

Նա ֆիզկուլտուրայի դասավանդման ամբիոնի վարիչ է։ Ավարտել է հեռակա բաժինը։ Ասում են՝ գրագիտությամբ չի փայլում։

«Պատկերացնո՞ւմ եք, եթե մի մարդ մեծատառ Զ, Չ, Ձ, Ջ իրար ա խառնում, քանի որ մի քիչ իրար նման են, էլ ի՞նչ խոսաս նրա մասին, նա վաբշե խելք չունի, լրիվ անգրագետ ա ախր»,- ծիծաղելով ասում է մեր զրուցակիցն ու հավելում․ «Լուրջ եմ ասում, գիտե՞ք, տենց դեպք ա եղել, խառնում ա իրար էդ տառերը, չեմ չափազանցնում»։

Պատմում են նաև, որ նրան հովանավորել են Լոռու նախկին մարզպետ Հենրիկ Քոչինյանը և քրեական հեղինակություն «Ճաճոյի Էդոն» (Էդիկ Մարտիրոսյանը)։

«Էդպես նրանց ժամանակ ընկավ գետի մեջ ու հունով սկսեց գնալ»,- ասում է մեր զրուցակիցը։ Մյուսն էլ նկատում է, որ Էվոյանը միանգամից 5 առարկա է դասավանդում, մինչդեռ դրանք լրիվ անհամատեղելի առարկաներ են և նա, հաստատ, դրանց բոլորին չի տիրապետում։

«Թող հլա մի հատ ատեստացիա անցկացնեն․ 2 առարկայից ավել չի կարելի պարապել, էդ ի՞նչ իրավունքով ա տըհենց պարապում, էդ ո՞նց կըլնի, որ տենց անգրագետը 5 առարկա պարապի»,- ասում է մեր զրուցակիցը։

Ուսանողները պատմում են, որ կարողանում են 150 000 դրամով չմասնակցել դասերին, 200 000 դրամով ավարտաճառ (դիսերտացիա) գրել տալ դասախոսներին, և էլի թվարկում են վերոհիշյալ դասախոսների և նրանց ընտանիքների կողմից մատուցվող ծառայություններ, որոնցից յուրաքանչուրի համար առանձին թվեր են վճարում։

«Ա, չե՛ք պատկերացնի, դիսերտացիան սաղ ընտանիքով գրում են կամ արտագրում, չգիտեմ, մեկ էլ տենըմ ենք, որ սաղինս իրար նման ա»,- ասում են մեր կողմից հարցված ուսանողները՝ կես կատակ-կես լուրջ, ու խնդրում հանկարծ իրենց անունները չհրապարակել։

Տղաներից մեկն էլ նկատում է՝ իր ավելի փոքր տարիքի ընկերներին ու նաև եղբորը խորհուրդ է տվել չգնալ Վանաձորի համալսարան, քանի որ այստեղ դասախոսները «գռփում» են։

NEWSPRESS.am-ը թեմայի շուրջ զրուցել է նաև այլ ուսանողների և ծնողների հետ, որը առանձին հոդվածով կներկայացնենք հաջորդիվ։

Իսկ առայժմ արձանագրված փաստերը ցույց են տալիս, որ համալսարանի ուսանողների թիվը բավականին նվազել է։ Համալսարանի ղեկավարությունը նույնիսկ հայտարարում է դպրոցականների մասնավոր պարապմունքներ՝ ԲՈւՀ ընդունվելու համար։

Արդյո՞ք ուսանողների թվի նվազման պատճառը ներսում տիրող բարձիթողի վիճակն ու կաշառակերությունն է՝ դեռ կպարզենք մեր հետաքննության արդյունքում։

Առայժմ՝ այսքանը․․․

Արմինե Մկրտումյան